Átta útskrifuðust úr námsleiðinni „Íslenska og atvinnulíf“
Í dag, 8. apríl, var útskrifað úr námsleiðinni Íslenska og atvinnulíf hjá Austurbrú. Námið var haldið í samstarfi við Alcoa Fjarðaál og voru þátttakendur starfsmenn fyrirtækisins, átta talsins. Markmið námsleiðarinnar er að efla íslenskukunnáttu þátttakenda, kynna þeim íslenskt atvinnulíf og samfélag og styrkja sjálfstraust og samskiptafærni.
Maður lærir best með samtali við fólk
Námsleiðin byggir á efni frá Fræðslumiðstöð atvinnulífsins og hefur verið kennd á íslensku. Það var því skilyrði að þátttakendur kynnu og skildu einfalda íslensku áður en námið hófst.
Úrsúla Manda Ármannsdóttir, verkefnastjóri hjá Austurbrú sem hélt utan um námsleiðina, segir markmiðið hafa verið skýrt frá upphafi. „Námið er skipt upp í þrennt, íslenskt mál, atvinnulíf og einnig að byggja upp sjálfstraust og samskiptafærni hjá nemendum,“ segir hún. Auk kennslu fengu þátttakendur fræðslu frá gestum og fóru í heimsóknir á ýmsa staði í nærsamfélaginu, meðal annars á bæjarskrifstofuna, Minjasafn Austurlands á Egilsttöðum, á leirverkstæði og á Stríðsárasafnið á Reyðarfirði.
Að sögn Úrsúlu voru viðbrögðin verið mjög góð. „Mér fannst bara frábært hvað þau eru dugleg að tala íslensku, og bara yfir höfuð hvað þau eru dugleg og viljug að læra tungumálið og um íslenskt samfélag,“ segir hún.
Tveir nemendur í náminu, þær Justyna Monika Hnatkowska og Natalia Bednarz, segja íslenskuna krefjandi en mikilvæga. Justyna, sem hefur búið á Íslandi í rúm þrettán ár, segir tungumálið alls ekki auðvelt. „Íslenskan er mjög erfið og ólík pólsku,“ segir hún.
Natalia, sem kom fyrst til Íslands árið 2015 og hefur búið hér síðan 2016, bendir á að enskan sé víða mjög áberandi í vinnuumhverfinu og geti það haft áhrif á íslenskunámið.
Þær eru sammála um að kunnátta í íslensku skipti miklu máli á vinnumarkaðnum og ekki síður í hinu daglega lífi. „Það er t.d. betra að tala íslensku við eldra fólk,“ segir Justyna. Þær nefna líka að besta leiðin til að læra tungumálið sé einfaldlega að nota það. „Maður lærir best með því að prófa að tala við fólk,“ segir Justyna en Natalia bætir við að það geti þó verið áskorun því Íslendingar eigi það til að skipta strax yfir á ensku.
Úrsúla segir áhuga vera fyrir því að halda verkefninu áfram. Hugmyndin sé að hefja nýjan hóp næsta haust, enda hafi samstarfið við Alcoa Fjarðaál gengið vel og skýr vilji sé til þess að styðja starfsfólk til frekari náms í íslensku.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
