Erindi og umræður um nýsköpun í dreifðum byggðum
Er hægt að búa til nýsköpun?
Mánudaginn 27. maí kl. 11-12 á Vonarlandi (húsnæði Austurbrúar) á Egilsstöðum
Austan mána í samstarfi við Austurbrú býður til erindis og umræðna um aðferðir til að styðja við nýsköpun í dreifðum
byggðum. Fundurinn er sérstaklega ætlaður þeim sem starfa við eða hafa áhuga á að efla nýsköpunarstarf í eigin nærumhverfi og reynt verður að svara því hvaða leiðir eru vænlegar til árangurs. Uppleggið byggir m.a. á tveggja ára rannsóknar- og þróunarverkefninu Að rækta vistkerfi nýsköpunar í dreifðum byggðum sem stutt var af Markáætlun um samfélagslegar áskoranir.
Upphafserindi flytur Arnar Sigurðsson, aðalrannsakandi verkefnisins. Hann hefur verið virkur þátttakandi í nýsköpunarumhverfi Íslands undanfarin ár sem kennari á háskólastigi, frumkvöðull og við að skapa aðstæður til nýsköpunar.
Hægt verður að hlusta í streymi ef óskað er eftir því.
Nýsköpunar- og klúðurkvöld
Án mistaka verður engin nýsköpun!
Þriðjudaginn 28. maí kl. 17 í Sláturhúsinu á Egilsstöðum
Kynning verður á nýsköpunarhraðlinum Austanátt sem fer af stað í lok sumars. Af því tilefni verður boðið upp á frásagnir af klúðri og mislukkuðum verkefnum. Tilgangurinn er að auka umburðarlyndi fyrir mistökum því ef við þorum ekki að gera mistök verður engin nýsköpun til. Klúðurkvöld byggir á alþjóðlegri fyrirmynd og er vettvangur þar sem hægt er að deila öllu því sem fer úrskeiðis við vinnu hugmynda og verkefna, í stað þess að segja aðeins frá því sem gengur eins og í sögu.
Stjórnandi kvöldsins er Arnar Sigurðsson frumkvöðull en hann er m.a. þekktur fyrir að vera einn af stofnendum Karolina fund, koma á fót Blábankanum á Þingeyri og stýrir í dag sköpunarrýminu Hafnar.haus í miðbæ Reykjavíkur.
Hvetjum öll áhugasöm, bæði þau sem eru með hugmyndir í kollinum og þau sem eru bara forvitin, að koma og njóta saman. Léttar veitingar í boði og vandræðaleg stemning.
Í upphafi árs 2023 var undirritaður viðaukasamningur við samning um Sóknaráætlun Austurlands á milli umhverfis-, orku- og loftslagsráðuneytis og Sambands sveitarfélaga á Austurlandi (SSA). Markmiðið með með honum var að styðja við nýsköpunarverkefni tengd hringrásarhagkerfinu með viðskiptahraðli sem heitir Austanátt.
Verkefnisstjórn
Páll Baldursson
Egilsstaðir
