Óendanlega margt að skoða
„Náttúrufegurð Austurlands er engri lík og er gríðarleg auðlind þegar kemur að ferðamennsku“ – Kári Kárason, flugmaður og Austfirðingur.
Frábær völlur með mikla möguleika til millilandaflugs
Flugstjórinn Kári Kárason flaug hinni nýju Airbus-þotu Icelandair, Esju, hringferð um landið um síðustu helgi. Hann segir Egilsstaðaflugvöll frábæran völl sem bjóði upp á mikla möguleika til millilandaflugs. Landfræðilegar aðstæður í kringum völlinn séu ákjósanlegar enda sé hann mikilvægur varaflugvöllur. Aukið flug gæti flýtt fyrir og styrkt nauðsynlega uppbyggingu vallarins. Lending á Egilsstöðum myndi hafa í för með sér eldsneytissparnað og svo geri einstök náttúrufegurð Austurlands svæðið að spennandi áfangastað fyrir ferðamenn.
Kári flaug Airbus þotunni til æfingalendinga á varaflugvöllunum á Egilsstöðum og Akureyri en aðaltilgangur flugsins var að þjálfa flugmenn þotunnar og gefa flugáhugafólki tækifæri til að sjá vélina lenda og taka á loft. Aðspurður um lendingu á Airbus A321 um hávetur á Egilsstaðaflugvelli sagði Kári það hafa gengið vel enda blíða „eins og Austurlandið er þekkt fyrir“ og aðflugið hafi verið mjög rúmt og auðvelt. „Lending á Egilsstaðaflugvelli er ekkert tiltökumál og 1850 metrar duga vel, nema í hálku og snjó. Þá þurfum við bara að nota bremsurnar meira en vélin fer létt með þetta. Það sama má segja um flugtakið. Airbus A321 gæti farið fullhlaðin með 187 farþega til Tenerife án þess að blása úr nös,“ segir Kári.
Mikilvægur varaflugvöllur
Kári segir Egilsstaðaflugvöll gríðarlega mikilvægan sem varaflugvöll fyrir Keflavíkurflugvöll. „Á Egilsstaðaflugvelli eru veðurskilyrði á hverjum tíma oft mjög frábrugðin því sem er á suðvesturhorninu og það kemur sér vel þegar veður er slæmt hinum megin á landinu. Auk þess er fjalllendi á Héraði ekki eins þröngt og til dæmis á Akureyri og blindaðflugskerfi (ILS) er á flugvellinum.“ Kári tekur þó fram að nauðsynlegt sé að hafa úr öllum millilandaflugvöllunum að velja þegar flugvélar þurfa að frá að hverfa í Keflavík þar sem flugumferð er orðin slík að enginn einn völlur geti tekið á móti allri flugumferð lokist Keflavíkurflugvöllur skyndilega.
Uppbygging flugvallarins má ekki bíða
Kári segir mikilvægt að huga að uppbyggingu á Egilsstaðaflugvelli til að tryggja öryggi þegar fleiri en ein flugvél þarf að lenda: „Akureyrarflugvöllur hefur fengið nýtt flugvélastæði, nýja flugstöð, ný aðflugstæki og lengingu flugbrautar á síðustu árum. Egilsstaðaflugvöllur hefur setið á hakanum frá því að ný flugbraut var gerð fyrir 30 árum og það er löngu tímabært að fara í alvöru framkvæmdir. Við flugmenn höfum oft rætt um mikilvægi þess að vera með akbraut samsíða flugbrautinni, til að flýta fyrir rýmingu eftir lendingu og hleypa næstu flugvél í aðflug án tafar. Lenging flugbrautar og bætt aðstaða á flugvélastæði skipta einnig miklu máli og afkastageta flugvallarins myndi aukast með flugumferðarstjórn á Egilsstaðavelli í slíkum aðstæðum, sem er öryggismál fyrir okkur flugmenn.“
Ekki mál þar sem á að spara
Til stendur að byggja nýja akbraut á Egilsstaðaflugvelli og samkvæmt drögum að samgönguáætlun eru framkvæmdirnar fyrirhugaðar á árunum 2026-2027. Kári segir flugmenn ósátta við útfærsluna, þar sem verið sé að spara á kostnað öryggis. „Við flugmenn höfum kallað eftir því að hafa samsíða akbraut meðfram flugbrautinni til að auka skilvirkni, öryggi og geymslupláss ef fjöldi flugvéla þarf að lenda á vellinum. Öryggisnefnd FÍA (Félag íslenskra atvinnuflugmanna) hefur lagt ríka áherslu á þetta atriði en síðan sjáum við drög að akbraut sem nær aðeins meðfram helmingi brautarinnar. Þetta er ekki eitthvað sem menn geta skorið niður í nafni sparnaðar og talið sig fá næstum jafngóða útkomu. Slík lausn kemst sennilega nærri því að vera 80% af kostnaði við samhliða akbraut eftir allri brautinni en bætir nýtingu ekki nema um 20%. Flugvélar þurfa að geta komið inn á flugvöllinn á færibandi og lent með öryggi.“
Tækifæri í beinu flugi
Kári segir mikil tækifæri í beinu flugi til og frá Evrópu í gegnum Egilsstaðaflugvöll. „Flugrekendur sem myndu fljúga reglulega til Egilsstaða frá Evrópu gætu sparað sér flugtíma, eldsneyti og afgreiðslutíma þar sem umferð um flugvöllinn er tiltölulega létt og afgreiðsla farþega hraðvirk. Eldsneytissparnaður einn og sér væri næstum 1.5 tonn á hverjum legg ef notuð er Airbus 321, borið saman við Keflavíkurflugvöll. Á ársgrundvelli væru þetta yfir 300 tonn af eldsneyti sem myndu sparast.“
Þá sé ónefnt aðdráttarafl ósnortinnar náttúru og víðáttu fyrir austan en hann segist mögulega hlutdrægur enda alinn upp á Norðfirði. „Náttúrufegurð Austurlands er engri lík og er gríðarleg auðlind þegar kemur að ferðamennsku. Þar eru áhugaverð samfélög að sækja heim, óendanlega margt að skoða, mikil gróska í menningar- og listastarfi og frábær aðstaða og leiðir fyrir skíða- og gönguferðir.“
Brautarljós mikilvæg
Kári byrjaði að læra flug árið 1987 þegar hann fluttist suður í menntaskóla. „Þá var farið í alla flugskóla á vellinum og farið í kynnisflug því þau voru ókeypis.“ Þá var ekki aftur snúið og fékk hann vinnu hjá Flugleiðum árið 1995 og hefur verið þar síðan. Fram af því hafði hann notið flugumferðarinnar á Norðfirði. „Mín fyrstu kynni af flugi voru að glápa út í loftið þegar Fokker F-27 vélarnar voru að lenda á Norðfjarðarflugvelli.“
Kári á margar eftirminnilegar stundir er tengjast flugi á Austurlandi og flaug hann meðal annars með starfsfólk Síldarvinnslunnar í árshátíðarferð erlendis. „Að taka flug yfir Neskaupstað á Boeing B757 með starfsfólk Síldarvinnslunnar er eitt það skemmtilegasta sem ég hef gert. Að fljúga svo stórri flugvél í firðinum fagra þar sem fjörðurinn og fjalllendið blasti við í öllu sínu veldi var ólýsanlegt.“
Í annari heimsókninni austur, fljúgandi oft sem áður, seinkaði aðeins suðurferðinni eftir mat hjá mömmu. Það var farið að rökkva og Norðfjarðarvöllur ekki útbúin neinum brautarljósum á þeim tíma. „Eftir að hafa lagt af stað aftur suður þurfti ég að snúa við stuttu seinna sökum veðurs og þá voru góð ráð dýr enda engin upplýst flugbraut á þessu svæði á þeim tíma. Veðrið var þó gott á Norðfirði þannig að ég sneri til baka og bað bróður minn að lýsa mér leiðina inn á flugvöll. Hann kom sér fyrir við brautarendann og skellti háu ljósunum á mig og náði ég að lenda á Norðfjarðarvelli í svarta myrkri.“ Í þessum aðstæðum hugsaði Kári hversu mikilvægt væri að hafa lýsingu á brautinni og undirstrikar hann mikilvægi lýsingar á öllum völlum og sérstaklega flugvöllum sem sinna reglulegu sjúkraflugi sem Norðfjarðarvöllur gerir. Eins og flestum er kunnugt hefur þetta var lagað á Norðfirði og flugbrautarljós við völlinn sem tryggja öryggi flugfarenda.
Talsmaður flugskóla á Austurlandi
Einkaflugið og kennsluflugið eiga undir högg að sækja á suðvesturhorni landsins þar sem erfitt er að fá pláss í loftrýminu til að æfa flug og takmarkanir eru á notkun á Reykjavíkurflugvelli. „Ég sé fyrir mér Flugháskóla á Austurlandi,“ segir Kári. „En til þess þyrfti aðstöðu á flugvellinum, flugskýli, kennslurými og aðstöðu fyrir flugvirkja. Ef af því verður að fá flugumferðastjórn á Egilsstaðavöll gætu nemendur lært í stjórnuðu loftrými, framkvæmt aðflug sem þarf fyrir blindflugskennslu og flogið reglulega á milli flugvalla á Austur- og Norð-Austurlandi.“
Texti: Alexandra Tómasdóttir.
Myndir: Úr safni nema myndin efst sem KK tók.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
