Varmadælur og styrkir: Svona virkar þetta
Spurningarnar rigndu inn á fundunum Hlýtt heimili og við tókum saman helstu svörin um varmadælur, styrki og niðurgreiðslur, ásamt gagnlegum tenglum.
Hlýtt heimili – algengar spurningar og gagnlegar upplýsingar
Í desember fóru fram fræðslufundirnir Hlýtt heimili, þar sem fjallað var um húshitun, orkunýtni og styrktækifæri fyrir heimili á Austurlandi. Fundirnir voru vel sóttir og vöktu mikla umræðu, með fjölmörgum spurningum frá íbúum um varmadælur, styrki og niðurgreiðslur. Í kjölfar fundanna hefur Austurbrú tekið saman helstu spurningar sem komu fram, ásamt gagnlegum tenglum og upplýsingum fyrir þá sem vilja kynna sér málið nánar.
Gagnlegir tenglar
Ráðgjafaþjónusta í Múlaþingi
HEF veitur bjóða íbúum á rafhituðum svæðum innan Múlaþings upp á ókeypis ráðgjafaþjónustu vegna uppsetningar varmadælukerfa.
Heimsóknir verða skipulagðar á vormánuðum 2026.
Reiknivélar og fræðsla
Á heimasíðu Orkuseturs má finna gagnleg verkfæri, meðal annars:
Upptaka frá fundi
Á YouTube er aðgengileg upptaka af fyrsta fundi Hlýs heimilis, sem haldinn var á Stöðvarfirði í apríl 2025.
Algengar spurningar
Hverjir geta sótt um varmadælustyrk?
Íbúðareigendur með niðurgreidda beina rafhitun sem ráðast í aðgerðir til að bæta orkunýtingu við húshitun.
Hver er styrkfjárhæðin?
Hámarksstyrkur árið 2026 er 1.567.000 kr.
Hvað er styrkt?
Búnaður og efniskostnaður (án vsk), allt að 50% af heildarkostnaði. Vinna og búnaður framan við hitagrind er ekki styrktur.
Hver er ávinningurinn af varmadælu?
Varmadælur framleiða að jafnaði 3–4 kW af varma fyrir hvert kW sem þær nota. Samkvæmt gögnum verður húshitunarkostnaður sambærilegur eða lægri en hjá heimilum með jarðhita.
Missi ég niðurgreiðslu rafhitunar ef ég fæ styrk?
Nei. Niðurgreiðslur haldast áfram, að hámarki 40.000 kWst á ári.
Hverjir eiga rétt á niðurgreiðslu rafhitunar?
Eigendur eða leigjendur íbúðarhúsnæðis án aðgangs að fullnægjandi jarðhitahitun. Sótt er um til Umhverfis- og orkustofnunar.
Er annar búnaður en varmadælur styrkhæfur?
Já, til dæmis viðarperluofnar og kamínur, ef búnaðurinn dregur úr beinni rafhitun eða olíukyndingu.
Hversu oft er hægt að fá styrk?
Styrkurinn endurnýjast á 15 ára fresti fyrir hverja fasteign.
Get ég fengið restina af styrknum síðar?
Já, ef ekki var nýtt öll styrkfjárhæðin í fyrstu umsókn.
Hversu lengi endist varmadæla?
Algengur endingartími er 15–20 ár, að því gefnu að varmadælan sé rétt valin og uppsett.
Fyrirspurnir og nánari upplýsingar
Hér að ofan má finna svör við algengustu spurningunum sem komu fram á fræðslufundunum Hlýtt heimili. Ef þú finnur ekki svör við þinni spurningu eða vilt fá frekari skýringar, er hægt að hafa samband við Austurbrú.
.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
