Samtök ferðaþjónustunnar, Markaðsstofa Norðurlands og Austurbrú standa fyrir fundi um stöðu og framtíð ferðaþjónustunnar í Norðausturkjördæmi í Hofi á Akureyri í dag, þriðjudaginn 10. nóvember, kl. 17–19. Fundurinn ber yfirskriftina Mótvindur – Eru stjórnvöld helsta hindrun ferðaþjónustunnar? og verður honum streymt beint á vef Samtaka ferðaþjónustunnar (SAF).

Á fundinum verður meðal annars fjallað um fyrirhugaðar skatta- og gjaldahækkanir í ferðaþjónustu og áhrif þeirra á rekstrarskilyrði greinarinnar, samkeppnishæfni og byggðaþróun. Deloitte mun kynna niðurstöður greiningar sem unnin var fyrir SAF á áhrifum fyrirhugaðra breytinga.

Sigrún Jóhanna Þráinsdóttir, verkefnastjóri hjá Austurbrú, verður meðal frummælenda og fjallar um stöðu og framtíð ferðaþjónustunnar í landshlutanum.

Í síðari hluta fundarins fara fram pallborðsumræður með sex þingmönnum Norðausturkjördæmis þar sem rætt verður um þau mál sem efst eru á baugi í ferðaþjónustunni.

Hægt verður að fylgjast með fundinum í beinu streymi á vef SAF.