Fjölbreyttar námsleiðir
Austurbrú býður upp á fjölbreytt úrval námsbrauta og námsleiða sem eru niðurgreiddar af Fræðslusjóði framhaldsfræðslunnar og ætlaðar fólki sem ekki hefur lokið formlegu námi. Námið er skipulagt í samstarfi við fyrirtæki og stofnanir, auk þess sem reglulega eru auglýstar opnar námsleiðir. Yfirlit yfir viðurkenndar námsbrautir og námsleiðir má finna á heimasíðu Fræðslumiðstöðvar atvinnulífsins. Á meðal námsleiða sem kenndar hafa verið hjá Austurbrú á undanförnum árum eru: Grunnnámskeið fyrir fiskvinnslufólk, Félagsliðagátt, Íslenska og atvinnulíf, Líf og heilsa, Nám í stóriðju (grunn- og framhaldsnám), Samfélagstúlkur, Stökkpallur og Uppleið – nám í hugrænni atferlismeðferð. Hér er neðan má sjá hvaða námsleiðir eru í boði hjá Austurbrú veturinn 2025-2026.
Framhaldsnám í stóriðju
Stóriðjuskólinn er eitt af lykilverkefnum Austurbrúar og rekinn í nánu samstarfi við Alcoa Fjarðaál. Nú stendur yfir framhaldsnám í stóriðju á 2. þrepi hæfniramma, ætlað starfsfólki sem hefur lokið grunnnámi í stóriðju og vill efla hæfni sína enn frekar. Námið er 500 klukkustundir og má meta til allt að 25 eininga á framhaldsskólastigi. Það sameinar bóklegt nám, verklega þjálfun og raunhæf verkefni á vinnustað, með áherslu á öryggi, gæði, verkferla, tækni og umbótastarf. Með fagtengdu lokaverkefni dýpka nemendur þekkingu sína á eigin starfsemi og vinna að verkefnum sem styrkja bæði þá sjálfa og vinnustaðinn. Markmiðið er að auka faglega færni, sjálfstraust og starfsánægju og styðja við verðmætasköpun og samkeppnishæfni stóriðju á Austurlandi.
Nánar
Grunnnámskeið fyrir fiskvinnslufólk
Grunnnámskeið fyrir fiskvinnslufólk er 128 klukkustunda nám á 1. þrepi hæfniramma sem er sérstaklega sniðið að þeim sem starfa við vinnslu og verkun sjávarafla – allt frá veiðum til borðs neytandans. Námið hentar fólki 18 ára og eldra með stutta formlega skólagöngu og krefst engra inntökuskilyrða. Lögð er áhersla á hagnýta þekkingu, gæði, hreinlæti, innra eftirlit og ábyrga meðferð matvæla, ásamt starfsþjálfun á vinnustað. Námið má meta til 7 eininga á framhaldsskólastigi og er skipulagt í nánu samstarfi við vinnustaði og viðurkennda fræðsluaðila.
Nánar
Íslenska og atvinnulíf
Íslenska og atvinnulíf er hagnýt námsleið fyrir fullorðið fólk af erlendum uppruna sem vill styrkja stöðu sína á íslenskum vinnumarkaði. Námið er 104 klukkustundir og sameinar íslenskunám, fræðslu um atvinnulíf og vinnumarkað, auk sjálfseflingar og samskiptafærni. Lögð er áhersla á að efla talmál og daglega tjáningu á íslensku, auka skilning á réttindum og skyldum launafólks og styðja við örugga og árangursríka þátttöku í samfélagi og starfi.
Fjallað er um vinnuvernd, stéttarfélög, launakerfi, skatta og algeng hugtök á vinnumarkaði, samhliða því að byggja upp sjálfstraust og samskiptahæfni. Markmiðið er að gera þátttakendur virkari í samfélaginu, styrkja starfshæfni þeirra og auðvelda aðlögun að íslensku vinnuumhverfi – með raunhæfum verkfærum sem nýtast strax í daglegu lífi og starfi.
Nánar
Stökkpallur
Stökkpallur er 180 klukkustunda nám á 1. þrepi sem má meta til 10 eininga á framhaldsskólastigi. Námið er ætlað fullorðnu fólki sem hefur horfið frá námi eða er án atvinnu og vill styrkja stöðu sína og byggja upp ný tækifæri. Áhersla er lögð á samskiptafærni, sjálfstraust, markmiðasetningu, fjármálalæsi og skipulögð vinnubrögð. Þátttakendur vinna markvisst að eigin færniuppbyggingu og kynnast mismunandi starfsumhverfi með það að markmiði að efla starfshæfni og trú á eigin getu. Námsleiðin er brú inn í atvinnulíf eða áframhaldandi nám með skýrum verkfærum sem nýtast í starfi og daglegu lífi.
Nánar
