Umhverfisráðstefna Austurlands

Umhverfisráðstefna Austurlands – Hvernig byggjum við 2050? er samstarfsverkefni Austurbrúar, Eflu og Eyglóar, þar sem sjónum er beint að sjálfbærri framtíð í mannvirkjagerð, skipulagi og nýtingu auðlinda með Austurland í forgrunni. Ráðstefnan fer fram í Sláturhúsinu á Egilsstöðum þann 5. júní og dregur til sín leiðandi sérfræðinga á sviði mannvirkjagerðar og vistvænna lausna. Ráðstefnan er öllum opin en skráning er nauðsynleg.

Dagskrá

9:30-10:00	Morgunkaffi og móttaka
10:00-10:40	Jóhanna Helgadóttir, skipulagsfræðingur og arkitekt: Vistvænt skipulag
10:40-10:55	Skarphéðinn Smári Þórhallsson: Hamborg, í hjarta Fljótsdals
10:55-11:10	Kaffihlé
11:10-11:50	Alexandra Kjeld, umhverfisverkfræðingur: Verðmæti í byggð
11:50-12:05	Gunnlaugur Guðjónsson, sviðsstjóri: Timburauðlindin
12:10-12:40	Hádegisverður á Tehúsinu
12:40-13:00	Leiðsögn arkitekts um Sláturhúsið
13:00-13:40	Sunna Ólafsdóttir Wallevik, efnafræðingur: Umhverfisvæn steinsteypa
13:40-13:55	- Tilkynnt síðar -
13:55-14:00	Kaffihlé
14:00-14:40	Arnhildur Pálmadóttir, arkitekt: Endurnýting byggingarefna
14:45-15:00	Hugleiðing heimamanns
15:00-15:45	Pallborð og samantekt
15:45	Ráðstefnulok
16:00	Kokteill og heimsóknir í Vallanes

Helga Jóhanna Bjarnadóttir, sviðsstjóri samfélags hjá Eflu verkfræðistofu, stýrir ráðstefnunni.

Jóhanna Helgadóttir

Skipulagsfræðingur og arkitekt, meðeigandi og fagstjóri skipulagsmála hjá Nordic Office of Architecture Íslandi

Vistvænt skipulag – Blikastaðaland; náttúrumiðuð hönnun
Unnið er að fyrsta áfanga deiliskipulags Blikastaðalands. Við mótun skipulagsins er leitast við að lágmarka neikvæð umhverfisáhrif af uppbyggingu og stuðla að seiglu gagnvart umhverfis- og samfélagslegum breytingum. Áhersla er á að endurheimta og efla náttúrugæði innan skipulagssvæðisins með það að markmiði að auka gæði í hinu byggða umhverfi. Stefnt er að því að skipulagsáætlunin hljóti vistvottun samkvæmt alþjóðlega vistvottunarkerfinu BREEAM Communities. Verkefnið er leitt af Nordic Office of Architecture í samstarfi við EFLU og dönsku hönnunarstofuna SLA.

Skarphéðinn Smári Þórhallsson

Landfræðingur

Hamborg, í hjarta Fljótsdals

Hvernig lítur dreifbýlið út eftir hálfa öld?
Íbúðabyggð var skipulögð á Hamborg í Fljótsdal með það að markmiði að skapa sjálfbæran, vistvænan og mannvænan byggðarkjarna þar sem náttúra og samfélag spila saman.

Í fyrirlestrinum verður farið yfir forsendur þessarar ákvörðunar og framtíðarþróun í svæðisins – með tilliti til fjarvinnu, sjálfbærni, breyttrar lífshátta og sívaxandi eftirspurnar eftir ró, rými og tengingu við landið.

Alexandra Kjeld

Umhverfisverkfræðingur

Verðmæti í byggð
Byggingariðnaðurinn er einn af stærstu áhrifavöldum losunar gróðurhúsalofttegunda og á heimsvísu er hið byggða umhverfi talið bera ábyrgð á um 42% af heildarlosun koldíoxíðs (CO2). Frá og með 1. september 2025 verða kolefnissporsútreikningar skylda fyrir allar byggingar sem sótt er um byggingarleyfi fyrir. Augljóst er að draga þarf úr umhverfisáhrifum mannvirkja, á sama tíma og hlúð er að vellíðan, samfélagi og ábyrgri nýtingu auðlinda.

Gunnlaugur Guðjónsson

Sviðsstjóri hjá Landi og skógi

Timburauðlindin

Timburskógrækt á Íslandi er enn á þróunarstigi en hefur vaxandi möguleika í ljósi aukinnar kolefnisbindingar, áherslu á sjálfbæra landnýtingu og vaxandi eftirspurnar eftir staðbundnu timbri. Með tegundavali, markvissri ræktun og umhirðu getur hún orðið raunhæfur valkostur fyrir innlent byggingarefni og atvinnusköpun í dreifbýli.

Sunna Ólafsdóttir Wallevik

Efnafræðingur hjá Gerosion Ltd.

Umhverfisvæn steinsteypa, byggingarefni og nýting á íslenskum auðlindum
Sunna fjallar um hönnun og útfærslu á umhverfisvænni steinsteypu og þróun á umhverfisvænu sementslausu AlSiment steinlími sem bindur koltvísýring og lækkar kolefnisspor byggingariðnaðar til muna. Gerosion hefur verið að þróa slíkar einkaleyfislausnir sem arftaka sements fyrir byggingariðnaðinn síðastliðin ár. Gerosion og Rockpore hafa einnig verið að þróa umhverfisvæn hringrásanleg léttfylliefni fyrir steinsteypu úr m.a. gler og steypuúrgangi. Ísland býr ríkulega yfir auðlindum og úrgangsstraumum sem gætu nýst þannig að steinsteypa og nýbyggingar séu algjörlega búnar til úr íslenskum hringrásanlegum hráefnum sem engan veginn er raunin í íslenskum byggingariðnaði í dag.

- Tilkynnt síðar -

Arnhildur Pálmadóttir

Arkitekt og handhafi umhverfisverðlauna Norðurlandaráðs

Endurnýting byggingarefna
Manneskjan er jarðfræðilegt afl sem umbreytir náttúrunni til að þjóna neyslu og framleiðslukerfum sínum og með því breytum við loftslagi jarðarinnar á áður óþekktum hraða. Mannvirkjagerð er stór hluti af þessum kerfum en arkitektúr getur verið krafturinn sem endurhugsar og mótar nýja framtíð. Hvaða byggingarefni eru íslensk og staðbundin? Hvernig líta náttúrulegustu mannvirki jarðar út, laus við skaðlega námuvinnslu og óendurnýtanlega orkuöflun?

Helga Jóhanna Bjarnadóttir

Efna- og umhverfisverkfræðingur, sviðsstjóri samfélagssviðs EFLU og situr í Loftslagsráði.

Ráðstefnustjóri

Helga hefur víðtæka reynslu af ráðgjöf á sviði umhverfisstjórnunar og loftslagsmála fyrir fyrirtæki og sveitarfélög og hefur sinnt vistvænni hönnun og vottun bygginga. Helga er viðurkenndur matsmaður fyrir vistvæna vottun mannvirkja samkvæmt alþjóðlega BREEAM vistvottunarkerfinu.

Skráning

Ráðstefnan er öllum opin og ókeypis en skráning er nauðsynleg.

Skráning

Hlaðvarp

Í nýjum þætti hlaðvarpsins okkar fjöllum við um Umhverfisráðstefnu Austurlands. Í þættinum ræðum við við Signýju Ormarsdóttur, sem situr í skipulagsteymi ráðstefnunnar fyrir hönd Austurbrúar og Skarphéðin Smára Þórhallsson, landfræðing sem segir frá fyrirhuguðum íbúakjarna í Fljótsdal.

Hlusta á þátt

Skarphéðinn Smári Þórhallsson og Signý Ormarsdóttir.