- 5. júní 2026
- 11:30 - 15:30
- Egilsbúð, Neskaupstaður
Hafið og framtíðin
Umhverfisráðstefna Austurlands verður haldin í annað sinn þann 5. júní í Egilsbúð í Neskaupstað. Að þessu sinni verður sjónum beint að hafinu, sjávarútvegi og þeim breytingum sem fram undan eru í nýtingu auðlinda, orkuskiptum og þróun greinarinnar.
Ráðstefnan er samstarfsverkefni Austurbrúar og Eyglóar og er ætlað að skapa vettvang fyrir samtal um umhverfismál og sjálfbæra þróun á Austurlandi. Í fyrra var áherslan á byggingariðnað og framtíð mannvirkjagerðar en nú færist fókusinn að hafinu og þeim áskorunum og tækifærum sem blasa við sjávarútvegi og tengdum greinum á tímum loftslags- og tæknibreytinga.
Á ráðstefnunni flytja fulltrúar úr rannsóknum, atvinnulífi og sjávarútvegi erindi um meðal annars fullnýtingu hráefna, fiskeldi, uppsjávarstofna og áhrif loftslagsbreytinga á hafið, auðlindanýtingu til framtíðar og orkuskipti í sjávarútvegi. Fundarstjóri verður Ísabella Ósk Másdóttir, verkefnastjóri samskipta hjá Umhverfis-, orku- og loftslagsráðuneytinu.
Markmið ráðstefnunnar er að efla samtal, miðla þekkingu og skapa vettvang fyrir tengslamyndun þvert á atvinnulíf, rannsóknir og samfélag.
Boðið verður upp á súpu á Hótel Hildibrand frá kl. 11:30 en dagskrá hefst í Egilsbúð kl. 12:15. Að erindum loknum verður opið spjall og tengslamyndun.
SkráningDagskrá
| 11:30 | Hádegisverður á Hótel Hildibrand |
| 12:15 |
Fundarsetning – Jóna Árný Þórðardóttir, bæjarstjóri Fjarðabyggðar Þorsteinn Másson, Samtök fyrirtækja í sjávarútvegi – Staða og framtíð fiskeldis Katrín Hulda Gunnarsdóttir, Matís – MeCCAM verkefnið Stefán Þór Eysteinsson, Matís – Sjálfbær verðmætasköpun Kaffihlé Hafþór Eiríksson, Síldarvinnslan – Orkuskipti í sjávarútvegi Hreiðar Þór Valtýsson, HA – Aflabrögð við Austurland í 60 ár Guðmundur J. Óskarsson, Hafrannsóknastofnun – Staða og framtíðarhorfur uppsjávarfisks |
| 15:00 | Kaffispjall og tengslamyndun |
Sjávarútvegur á tímamótum
Fram koma sérfræðingar úr rannsóknum, sjávarútvegi og atvinnulífi sem fjalla um áhrif loftslagsbreytinga á hafið, orkuskipti í sjávarútvegi, fullnýtingu hráefna, fiskeldi og framtíðarhorfur uppsjávarstofna. Málefnin snerta Austurland með beinum hætti enda er sjávarútvegur ein af grunnstoðum atvinnulífs og verðmætasköpunar í fjórðungnum. Fyrirlestrarnir varpa ljósi á þær breytingar sem eru fram undan í greininni og þau tækifæri sem felast í nýsköpun, sjálfbærni og aukinni þekkingu.
Katrín Hulda Gunnarsdóttir
Verkefnastjóri hjá Matís
Erindi: MeCCAM – Mótvægis- og aðlögunaraðgerðir gagnvart áhrifum loftslagsbreytinga í evrópskum sjávarútvegi
Katrín Hulda Gunnarsdóttir er verkefnastjóri hjá Matís og vinnur að rannsóknum og þróunarverkefnum á sviði sjálfbærni og nýsköpunar í sjávarútvegi.
Í erindi sínu fjallar hún um evrópska verkefnið MeCCAM sem snýr að því hvernig sjávarútvegur getur brugðist við áhrifum loftslagsbreytinga með mótvægis- og aðlögunaraðgerðum. Farið verður yfir hvernig breytingar í hafinu hafa áhrif á atvinnugreinina, hvaða áskoranir blasa við og hvaða tækifæri felast í aukinni þekkingu, samstarfi og nýsköpun til framtíðar.
Stefán Þór Eysteinsson
Sérfræðingur hjá Matís
Erindi: Hvert kíló skiptir máli – fullnýting og sjálfbær verðmætasköpun
Stefán Þór Eysteinsson starfar hjá Matís þar sem hann kemur að verkefnum tengdum matvælaframleiðslu, nýsköpun og sjálfbærri nýtingu auðlinda.
Í erindinu fjallar hann um fullnýtingu hráefna í uppsjávarvinnslu og hvernig rannsóknir og nýsköpun geta aukið verðmæti hráefnis sem áður var vannýtt. Sérstök áhersla verður lögð á hvernig aukin nýting hráefna getur stutt við sjálfbærari sjávarútveg, dregið úr sóun og skapað ný tækifæri í verðmætasköpun.
Þorsteinn Másson
Sérfræðingur í fiskeldi hjá Samtökum fyrirtækja í sjávarútvegi
Erindi: Staða og framtíð fiskeldis á Íslandi
Þorsteinn Másson er sérfræðingur í fiskeldi hjá Samtökum fyrirtækja í sjávarútvegi. Hann hefur töluverða reynslu úr sjávarútvegi, fiskeldi og orkugeiranum og er menntaður viðskiptafræðingur og vélstjóri. Fiskeldi hefur verið nefnt sem einn helsti vaxtabroddur íslensks atvinnulífs, en greinin er enn í uppbyggingarfasa og mörgu að huga þegar kemur að regluverki, umhverfisáhrifum og samkeppnishæfni.
Í erindinu mun Þorsteinn fara yfir stöðu greinarinnar í dag og fjalla um kosti og galla mismunandi aðferða við fiskeldi.
Guðmundur J. Óskarsson
Sviðsstjóri á uppsjávarsviði Hafrannsóknastofnunar
Erindi: Staða og framtíðarhorfur með veiðar á uppsjávarfiski
Guðmundur J. Óskarsson starfar hjá Hafrannsóknastofnun og hefur sérhæft sig í rannsóknum á uppsjávarstofnum við Ísland.
Í erindinu fer hann yfir stöðu helstu uppsjávarstofna og þá þætti sem hafa mest áhrif á þróun þeirra, þar á meðal nýliðun, vöxt og náttúrulegan dauða. Kynnt verða nýjustu stofnmöt og horfur fyrir komandi ár, auk þess sem sjónum verður beint að áhrifum loftslags- og umhverfisbreytinga á útbreiðslu og veiðimöguleika stofnanna til framtíðar.
Hafþór Eiríksson
Rekstrarstjóri fiskimjölsverksmiðju Síldarvinnslunnar
Erindi: Orkuskipti í sjávarútvegi í framkvæmd
Hafþór Eiríksson er rekstrarstjóri fiskimjölsverksmiðju Síldarvinnslunnar og hefur komið að fjölbreyttum verkefnum sem snúa að orkunýtingu og umbótum í rekstri.
Í erindinu fjallar hann um þær breytingar sem fyrirtækið hefur ráðist í á undanförnum árum til að draga úr olíunotkun og minnka umhverfisáhrif starfseminnar. Einnig fer hann yfir nýlegt verkefni sem hlaut styrk úr Orkusjóði og hvernig markvissar aðgerðir í rekstri geta skilað bæði aukinni hagkvæmni og jákvæðum áhrifum fyrir umhverfið.
Hreiðar Þór Valtýsson
Dósent í sjávarútvegsfræði við Háskólann á Akureyri
Erindi: Aflabrögð við Austurland í 60 ár og áhrif umhverfisins á fiskistofna þar
Hreiðar Þór Valtýsson er dósent í sjávarútvegsfræði við Háskólann á Akureyri og hefur um árabil rannsakað þróun íslensks sjávarútvegs, fiskveiðiflota og afla einstakra skipa. Í erindinu fjallar hann um botnfiskveiðar við Austurland og hvernig aflabrögð austfirskra skipa hafa þróast frá árinu 1966. Þá verður sjónum beint að tengslum veiða við sókn og umhverfisþætti, auk þess sem farið verður yfir möguleg áhrif loftslags- og umhverfisbreytinga á útbreiðslu fiskistofna og veiðimöguleika til framtíðar.
