Tíu nemendur eru skráðir í nám í Háskólagrunni Háskólans í Reykjavík sem kenndur er á Austurlandi í fyrsta sinn á þessari önn. Fyrsti kennsludagurinn er ný af staðinn.
Námið er staðbundið með stafrænum lausnum og hugsað til þess að koma til móts við þarfir nemenda og fyrirtækja á Austurlandi. Um er að ræða aðfaranám fyrir háskóla þar sem nemendur geta undirbúið sig fyrir nám í verk- og tæknifræði eða tölvunarfræði. Þetta er í fyrsta skipti sem sérhæft aðfararnám er kennt með þessum hætti á Austurlandi.
„Það er ánægjulegt að fá að taka á móti nýjum nemendum hér á Austurlandi og styðja þá í að ná markmiðum sínum,“ segir Bjarni Þór Haraldsson, nýráðinn verkefnastjóri uppbyggingar háskólanáms á Austurlandi. „Tíu nemendur hófu nám og hópurinn er öflugur. Það er ánægja meðal þeirra að geta stundað aðfaranám hér á Austurlandi. Námið er vandað og veitir haldgóðan undirbúning fyrir frekara háskólanám. Mikil áhersla er lögð á góða samvinnu nemenda og kennara og að nemendur hafi stuðning hver af öðrum.“
Bjarni mun sjá stuðning við nemendur á Austurlandi og meðal annars sinna dæmatíma- og verkefnaaðstoð en kennt er í Fróðleiksmolanum á Reyðarfirði. Háskólagrunnur HR á Austurlandi er samstarfsverkefni Austurbrúar, Háskólans í Reykjavík og Háskólans á Akureyri, fyrirtækja og sveitarfélaga á svæðinu, auk menntamálayfirvalda. Verkefnið snýr að uppbyggingu háskólastarfsemi á Austurlandi og er nú unnið að tillögum um uppbyggingu B.S.-náms í tæknifræði sem mun styðja við atvinnulífið á Austurlandi. Einnig er unnið að frekari þróun á þjónustu við stað- og fjarnema á Austurlandi óháð því hvaða nám þeir stunda.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn