Haustþing SSA 2023

Góðir gestir

Haustþing Sambands sveitarfélaga á Austurlandi (SSA) fór fram í Végarði í Fljótsdal dagana 28.-29. september 2023. Þar komu saman sveitarstjórnarfulltrúar sveitarfélaganna fjögurra ásamt bæjar- og sveitarstjórum og starfsfólki fundarins en það var frá Austurbrú.

Haustþingið tók á móti góðum gestum. Eftir að formaður SSA, Berglind Harpa Svavarsdóttir, hafði sett þingið flutti Guðlaugur Þór Þórðarson, umhverfis-, orku- og loftslagsráðherra, ávarp. Auk hans ávarpaði Ingibjörg Isaksen, 1. þingmaður Norðausturkjördæmis, haustþingið.

Berglind Harpa, formaður SSA, setti þingið.

Guðlaugur Þór Þórðarson, umhverfis-, orku- og loftslagsráðherra, flutti ávarp.

Ingibjörg Isaksen, fyrsti þingmaður kjördæmisins.

Jákvæð sálfræði

Ragnhildur Vigfúsdóttir, fyrirlesari og markþjálfi, flutti skemmtilegan og áhugaverðan fyrirlestur um jákvæða sálfræði, styrkleika, jákvæðar tilfinningar og hamingjuaukandi aðgerðir. Þinggestir lærðu þar ýmislegt gagnlegt í samvinnu og samstarfi og skemmtu sér vel, eins og sjá má á meðfylgjandi myndum.

Ragnhildur Vigfúsdóttir flutti fyrirlestur.

Sara Elísabet, sveitarstjóri Vopnafjarðarhrepps.

Þinggestir skemmtu sér vel undir fyrirlestri Ragnhildar.

Hópastarf um hagsmunamál

Að erindum og fyrirlestrum loknum unnu sveitarstjórnarfulltrúarnir saman í fjórum hópum þar sem rætt var um helstu hagsmunamál og viðfangsefni landshlutans. Fjórir hópar störfuðu undir yfirskrift kaflanna fjögurra í Svæðisskipulagi Austurlands; Góð heimkynni, Svæði sóknarfæra, Sterkt samfélag og Ævintýri líkast.

Efnistök voru fjölbreytt að venju en fjallað var m.a. um heilbrigðismál, samgöngur, atvinnumál, fjarskipti, matvælaframleiðslu, menntun, skatta og tekjustofna, ferðaþjónustu og ýmis önnur samfélagsmálefni, s.s. íbúa af erlendum uppruna, íþróttir, tómstundir og menningu.

Afrakstur þessarar vinnu var svo til umfjöllunar seinni dag þingsins og myndar ályktanir SSA undir yfirskriftinni „Leysum kraftinn úr læðingi“ og skoða má hér að neðan:

Skoða ályktanir

Menningarverðlaun SSA

Félag ljóðaunnenda á Austurlandi hlaut menningarverðlaun Sambands sveitarfélaga á Austurlandi á haustþinginu. Verðlaunin eru veitt árlega einstaklingi, stofnun eða samtökum á Austurlandi fyrir eftirtektarvert framtak á sviði lista og menningar. Félag ljóðaunnenda á Austurlandi var stofnað á Stöðvarfirði 1996 og hefur verið eitt ötulasta útgáfufélag ljóðabóka á landinu frá aldamótum. Berglind Harpa Svavarsdóttir, formaður SSA, afhendi formanni félagsins, Magnúsi Stefánssyni, verðlaunin í Snæfellsstofu.

Nánar

Heiðursgestur

Heiðursgestur haustþings SSA að þessu sinni var Sigríður Bragadóttir frá Vopnafirði.

Sigríður fluttist austur frá Sandgerði ásamt eiginmanni sínum, Halldóri Georgssyni, árið 1979. Þau keyptu jörðina Síreksstaði í Vopnafirði og ráku þar bú og síðar ferðaþjónustu árið með fram búskapnum. Þau hættu rekstrinum í lok árs 2017 og fluttu í þorpið þar sem þau búa enn. Sigríður er mikil félagsmálamanneskja; hefur átt sæti í sóknarnefnd, kvenfélaginu og Búnaðarfélagi Vopnafjarðar og verið virkur þátttakandi í margskonar góðgerðarmálum. Hún tók fyrst sæti á framboðslista á sjötugsaldri og sat í sveitarstjórn Vopnafjarðarhrepps.

Formaður SSA færði Sigríði blóm og bestu þakkir fyrir framlag hennar til sveitarstjórnarmála og annarra samfélagsmála á Austurlandi.

Gögn

28/9/2023

Haustþing SSA 2023: Ályktanir

3/10/2023

Haustþing SSA 2023: Fundargerð

Svipmyndir frá haustþinginu

Dagskrá

Fimmtudagur 28. september

9:30	Mæting í Végarð: Skráning og morgunkaffi
10:00-10:15	Haustþing sett Formaður SSA, Berglind Harpa Svavarsdóttir, setur þingið.
10:15-10:50	Ávarp: Guðlaugur Þór Þórðarson, umhverfis-, orku- og loftslagsráðherra
11:00-12:00	Fyrirlestur: Ragnhildur Vigfúsdóttir
12:00-13:00	Hádegisverður á Skriðuklaustri
13:15-13:30	Ávarp formanns, Berglindar Hörpu Svavarsdóttur
13:30-14:45	Hópastarf
14:45-15:00	Kaffihlé
15:00-16:00	Ávarp: Ingibjörg Isaksen, 1. þingmaður Norðausturkjördæmis
16:00	Dagskrá heimamanna, afhending menningarverðlauna og val heiðursgests
19:30	Kvöldverður í Óbyggðasetri Íslands

Föstudagur 29. september

9:00-10:00	Hópstjórar og ritarar hópa leggja lokahönd á hópavinnu
10:00-11:30	Hópar kynna vinnu sína (15 mín. á hvern hóp)
11:30-11:45	Kosning
11:45	Haustþingi slitið
12:00	Hádegisverður
13:00	Ganga upp að Hengifossi (valfrjálst) Skráning og réttur klæðnaður nauðsynlegur.