Hugmyndir spretta um allt land
Verkefni úr ólíkum landshlutum stigu fram á Iceland Innovation Week á sérstökum viðburði í Grósku og sýndu að frumkvöðlastarf á sér stað um land allt.
Nýsköpun á landsbyggðinni í sviðsljósinu
Iceland Innovation Week fór fram í Reykjavík í síðustu viku og líkt og undanfarin ár var þar saman komin fjölbreytt flóra frumkvöðla, fjárfesta og hagaðila úr íslensku nýsköpunarumhverfi. Samhliða aðalviðburðum vikunnar stóðu landshlutasamtökin ásamt Byggðastofnun fyrir hliðarviðburði í Grósku þar sem kastljósinu var beint að nýsköpun á landsbyggðinni.
Viðburðurinn var hluti af kynningu á Startup Landinu, nýsköpunarhraðli fyrir frumkvöðla utan höfuðborgarsvæðisins. Þar kynntu þátttakendur verkefni sín í stuttum og lifandi pitch-kynningum, auk þess sem lengra komin fyrirtæki með rætur í landsbyggðinni sögðu frá sinni vegferð frá fyrstu hugmynd til vaxtar.
Markmiðið var að varpa ljósi á þá fjölbreyttu og vaxandi starfsemi sem á sér stað víðs vegar um landið, efla tengsl og skapa vettvang fyrir samtal um hvernig styrkja megi nýsköpun utan höfuðborgarsvæðisins.
„Við þurfum að minna á okkur“
Að sögn Margrétar Polly Hansen, verkefnastjóra Startup Landsins hjá SASS, hefur nýsköpunarumræðan á Íslandi lengi verið miðlæg, „svolítið höfuðborgarmiðuð,“ eins og hún segir. „Við erum að reyna að vekja meiri athygli á frumkvöðlum og sprotafyrirtækjum á landsbyggðinni og minna fólk á að nýsköpun fer líka fram úti á landi.“
Polly bendir á að viðburðir á borð við Iceland Innovation Week nái ekki alltaf til fólks á landsbyggðinni, bæði vegna fjarlægðar og þess að þeir virki stundum ekki sem hluti af þeirra veruleika. „Það er fullt af flottum verkefnum úti á landi sem þarf líka að ná til og sinna og það var okkar markmið,“ bætir hún við.
Frumkvöðlastarf á landsbyggðinni hefur sín sérkenni. „Þetta er oft fólk sem vill búa á ákveðnum stað og þarf að skapa sér atvinnu þar,“ segir Polly, „og það krefst oft mikillar útsjónarsemi og ákveðni.“
Þrátt fyrir áskoranir felast einnig tækifæri í þessari stöðu. Staðsetning, nálægð við náttúru og tenging við nærumhverfi geta orðið hluti af sérstöðu verkefna.
„Það skiptir miklu máli að nýta upprunann og söguna,“ segir hún. „Það er oft lykilatriði í því að skapa verðmæti.“
Polly bendir einnig á að nýsköpun þurfi ekki alltaf að snúast um stór alþjóðleg fyrirtæki.
„Þetta þarf ekki alltaf að verða að einhverju stórfyrirtæki. Stundum snýst þetta um að skapa eitt eða tvö störf í heimabyggð. Það getur breytt miklu í litlum samfélögum.“
Sameiginlegur hraðall fyrir allt landið
Startup Landið varð til út frá samstarfi landshlutasamtaka um allt land, sem áður höfðu staðið fyrir hröðlum hvert í sínum landshluta. Með sameiningu kraftanna varð til vettvangur sem nær yfir landið allt.
„Hugmyndin var að gera þetta bæði hagkvæmara og sterkara,“ útskýrir Polly, „að ná til bestu verkefnanna þvert á landið og leggja meira í fræðslu og stuðning.“
Sýnileiki og sögur
Á viðburðinum í Grósku vakti athygli hversu fjölbreytt verkefnin voru. Margrét segir að fólk, jafnvel heimamenn í landshlutunum, átti sig ekki alltaf á því hversu öflug frumkvöðlastarfsemin er. Það skorti sýnileika og þar geti landshlutasamtökin lagt hönd á plóg með viðburði af þessu tagi.
„Við þurfum að heyra svona sögur,“ segir hún. „Fólk þarf að sjá alvöru dæmi um vel heppnað frumkvöðlastarf á landsbyggðinni og þá getur það ef til vill betur tengt sig við það. Þá hugsar það kannski: Þetta er eitthvað sem ég gæti gert.“
Hún leggur áherslu á að mikilvægt sé að halda áfram að auka sýnileika nýsköpunar á landsbyggðinni og styrkja tengingar milli frumkvöðla, fjárfesta og stuðningsaðila þvert á landið.
Í fyrstu keyrslu hraðalsins í fyrra bárust rúmlega fimmtíu umsóknir og voru tólf teymi valin til þátttöku. Fyrirkomulagið er að mestu rafrænt, sem hentar vel fyrir þátttakendur á dreifðum svæðum, en þó var lögð áhersla á að hefja ferlið með sameiginlegum fundi þar sem þátttakendur hittust og mynduðu tengsl sín á milli.
Að hennar sögn kom það skemmtilega á óvart hversu sterk tengsl mynduðust í hópnum þrátt fyrir hið rafræna fyrirkomulag. „Það sem kom kannski mest á óvart var hvað stemningin varð góð og tengslin sterk. Fólk er enn í sambandi og leitar hvert til annars þótt hraðlinum sé lokið fyrir nokkru.“
Opið fyrir umsóknir
Næsta skref er þegar hafið. Opið er fyrir umsóknir í næstu umferð Startup Landsins og er umsóknarfrestur til 1. september. Markmiðið er áfram það sama: að styðja við frumkvöðla um allt land og skapa öflugt tengslanet sem styrkir nýsköpun í heimabyggðum.
Sæktu um!
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
