Vinnustofa um matarhefðir og nýsköpun haldin á Orkneyjum
Um fjörutíu manns frá Íslandi, Færeyjum og skosku eyjunum tóku þátt í vinnustofu um nýsköpun, matarhefðir og fæðuöryggi sem haldin var í lok apríl í Kirkwall á Orkneyjum. Verkefnið er hluti norræns samstarfsverkefnis um fæðuöryggi, FLORA, sem var hleypt af stokkunum í nóvember sl en Austurland er fulltrúi Íslands í verkefninu. Það byggir á að viðhalda og virkja hefðir í matvælaframleiðslu sem lið í því að auka fæðuöryggi. FLORA hlaut styrk frá NAPA, norrænu menningarstofnuninni á Grænlandi, og tekur Austurbrú þátt í verkefninu fyrir Íslands hönd. Auk Íslands taka Grænland, Færeyjar, Norður-Noregur og Orkneyjar þátt.
Kynning á framleiðslu og áskorunum í dreifbýli
Fulltrúar Austurlands voru Elís Pétur Elísson frá Goðaborg, Eygló Björk Ólafsdóttir frá Vallanesi og Ýmir Eiríksson frá Háskóla Íslands á Hallormsstað. Þau kynntu sitt starf og framleiðslu og þær áskoranir sem matvæla- og drykkjaframleiðendur í dreifbýli fjarri höfuðborgarsvæðinu standa frammi fyrir, allt frá þróun og framleiðslu, til kynningar og flutninga. Aðrir þátttakendur frá Orkneyjum, Hjaltlandseyjum og Vestureyjum voru framleiðendur, matreiðslufólk og háskólafólk sem horfir til að tengja betur nám og framleiðslu og þróun matvæla.
Þriggja ára verkefni
FLORA stendur yfir í þrjú ár. Á þeim tíma verða haldnar vinnustofur í öllum þátttökulöndum þar sem unnið verður með arfleifð í matarmenningu og hvernig megi byggja á henni til að þróa nýjar afurðir. Markmiðið er að varðveita hefðir um leið og þær eru gerðar sýnilegri og aðgengilegri fyrir nýjar kynslóðir. Í tengslum við vinnustofuna í Kirkwall voru framleiðendur heimsóttir, m.a. elsta starfandi myllan á eyjunum þar sem malaðar eru gamlar tegundir byggs, og viskíframleiðandi sem byggir á gömlum hefðum.
Vinnustofa á Austurlandi í haust
FLORA byggir á sama grunni og verkefnið Sjávarföll, sem Austurbrú hefur unnið að með styrk frá Byggðastofnun, og snýst um vöruþróun byggða á matarhefðum í sjávarútvegi. Stefnt er að því að halda vinnustofu á Austurlandi haustið 2026 með þátttakendum frá Íslandi og öðrum samstarfslöndum verkefnisins.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
