Aðalfundur Samtaka þekkingarsetra var haldinn í Vestmannaeyjum 26. ágúst. Fulltrúar allra sjö þekkingarsetranna sóttu fundinn, þar á meðal fulltrúi Austurbrúar.

Á fundinum var farið yfir starfsemi og helstu verkefni samtakanna á liðnu ári. Grettir Jóhannesson flutti jafnframt fræðsluerindið Er framtíðin mætt? um hraða þróun gervigreindar og áhrif hennar á samfélag og vinnumarkað. Að loknum hefðbundnum aðalfundarstörfum ræddu fulltrúar setranna sameiginlega stefnumótun og samstarf til framtíðar.

Þátttakendur heimsóttu einnig Þekkingarsetur Vestmannaeyja og fengu góða innsýn í starfsemi þess og þá öflugu uppbyggingu sem átt hefur sér stað í húsnæðinu að Ægisgötu 2. Fjölmörg fyrirtæki og stofnanir starfa þar undir sama þaki og góð aðstaða hefur verið byggð upp fyrir samstarf, rannsóknir og nýsköpun. Þar er meðal annars að finna samvinnurými, rannsóknaraðstöðu, blautrými fyrir búnað sem nýttur er í sjóferðum og hlýleg sameiginleg rými. Vinnuaðstaðan er til fyrirmyndar og útsýnið yfir höfnina ekki af verri endanum.