Úr myndasafninu
Austurbrú dustar rykið af gömlum ljósmyndum og rifjar upp fólkið, fundina og málin sem efst voru á baugi.
Liðin augnablik úr sögu SSA
Í tilefni af 60 ára afmæli Sambands sveitarfélaga á Austurlandi (SSA) í haust hefur Austurbrú undanfarnar vikur birt gamlar ljósmyndir úr safni sambandsins á samfélagsmiðlum. Myndirnar hafa vakið töluverða athygli og margir hafa lagt hönd á plóg við að bera kennsl á fólk og rifja upp sögur frá liðnum árum.
Myndirnar eru úr safni SSA og tengjast meðal annars aðalfundum sambandsins víða um Austurland. Með birtingunni er ekki aðeins verið að dusta rykið af gömlum ljósmyndum heldur einnig rifja upp þau mál sem sveitarstjórnarfólk á Austurlandi fékkst við á hverjum tíma.
Þannig hafa að undanförnu birst myndir frá aðalfundi SSA á Seyðisfirði árið 2002, Breiðdalsvík árið 2003, Hallormsstað árið 2011 og nú síðast frá Freysnesi í Öræfum árið 2000. Samhliða myndunum hefur verið leitað í gömlum fundargögnum og samtímaumfjöllun fjölmiðla til að draga fram helstu umræðuefni fundanna. Og sum þeirra hljóma kunnuglega enn í dag.
Áherslur sem lifa
Á fundinum í Freysnesi árið 2000 var til dæmis kallað eftir því að undirbúningi jarðganga milli Reyðarfjarðar og Fáskrúðsfjarðar yrði flýtt og jafnframt rannsóknum á göngum milli Eskifjarðar og Norðfjarðar. Bæði verkefnin urðu síðar að veruleika. Þar var einnig rætt um uppbyggingu háskólamenntunar á Austurlandi, fjarnám og fjarvinnslu opinberra verkefna.
Á Hallormsstað árið 2011 var síðan tekin ákvörðun sem varð mikilvægur þáttur í aðdraganda stofnunar Austurbrúar. Aðalfundurinn samþykkti að sameina daglegan rekstur SSA og starfsemi nokkurra stoðstofnana á Austurlandi undir einum hatti. Austurbrú var formlega stofnuð árið eftir.
„Allt morandi af þingmönnum“
Gömul dagblöð hafa sömuleiðis reynst skemmtileg heimild um tíðarandann. Eftir fundinn í Freysnesi árið 2000 sagði til dæmis í fyrirsögn Austurlands að „allt [væri] morandi af þingmönnum á aðalfundi SSA“, enda fjölmenntu þingmenn á fundinn vegna þeirra breytinga á kjördæmaskipan sem þá voru fram undan.
Myndasyrpurnar munu halda áfram að birtast fram að 60 ára afmæli SSA í haust. Allar ábendingar um fólkið á myndunum, staðsetningar og sögurnar að baki þeim eru vel þegnar og hjálpa um leið til við að varðveita sögu sambandsins.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
