Jens Einarsson er einn af þeim sem útskifaðist frá námsleiðinni Beint frá býli í maí, sem kennd var í góðu samstarfi Austurbrúar og Hallormsstaðaskóla. Lokaverkefnið hans komst í úrslit Ullarþons svokallaðs sem haldið var á dögunum, hugmyndasamkeppni til að auka verðmæti ullarinnar. Verkefnið hans snerist um hönnun „hljóðgildra“ sem notaðar eru til að bæta hljóðvist t.d. í hljóðverum.
Jens Einarsson var einn af þeim sem útskifaðist úr námsleiðinni Beint frá býli í maí en námið var kennt í góðu samstarfi Austurbrúar og Hallormsstaðaskóla. Á námskeiðinu vann hann lokaverkefnið Heilnæm hljóðvist en inntak þess er að framleiða hljóðdempandi lausnir úr mislitri kindaull af lifandi sauðfé, í bland við lerki, ösp og aðrar tilfallandi íslenskar viðartegundir. Verkefnið hans komst í úrslit Ullarþons og var þannig eitt af fimm verkefnum sem kepptu til úrslita. Frábær árangur þótt ekki hafi hann unnið keppnina þegar yfir lauk.
Hugmyndin af verkefninu kviknaði eftir að Jens hóf að hljóðmeðhöndla heimastúdíó á Egilsstöðum en hingað til hefur steinull verið ódýrasti kosturinn til þess. Jens segir steinullina vera bæði óþægilega í meðhöndlun og þar sem agnir úr henni virðast lengi finna leið út í rýmið þá séu margir sem finna fyrir ofnæmieinkennum þar sem steinull er notuð og aðeins klædd frá með tauefnum. „Í framhaldi af þessu kviknaði sú hugmynd að nota kindaull í þessar svokölluðu hljóðgildrur, eða hljóðdempara. Sem sagt, náttúrulegt og heilnæmt efni,“ segir hann. Jens hafði samband við verksmiðjustjóra í þvottastöðinni á Blönduósi og komst þá að því að mislita ullin er ekki ennþá komin í tísku og þar af leiðandi enn á lágu verði.
Til að skapa afurðunni sérstöðu var ákveðið að hafa hljóðgildrurnar alíslenskar, hafa ramma og annað tréverk utan um ullina úr lerki, ösp og birki úr skógum á Héraði. Markmiðið var að staðfesta að það væri grundvöllur fyrir því að framleiða hljóðdempandi lausnir úr kindaull og íslensku timbri en hafa þær jafnframt fallegar þannig að þær yrðu stofuprýði og jafnvel listaverk. Þá yrðu einnig framleiddar einfaldari og ódýrari útgáfur.
„Að mínu mati er hér um tækifæri að ræða til að nýta hráefni af landsins gæðum sem ekki hefur fundist nægilegur markaður fyrir, svo sem mislita ull af lifandi sauðfé og börk lerkitrjáa,“ segir Jens. „Ég tel að hér sé um gott atvinnutækifæri að ræða, fyrir mig og aðra þátttakendur í verkefninu og tel að sú framleiðsla sem hér er teiknuð upp uppfylli kröfur um sjálfbærni og vistvæna framleiðslu og sé jákvætt skref fyrir atvinnulíf og samfélag á Austurlandi.“
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn