Um nokkurt skeið hafa Austurbrú og Auður Austurlands unnið að verkefni sem kallast „Láttu stjörnuna leiða þig.“ Það felst í því að gera austfirskar matvörur sýnilegri og aðgengilegri fyrir íbúa Austurlands og gesti sem sækja okkur heim.

Haustið 2023 fékk Auður Austurlands styrk, frá Uppbyggingarsjóði Austurlands, til að framkvæma verkefnið og nú hafa verið settir sérstakir vörustandar í allar Kjörbúðir á Austurlandi, auk þess sem Búðin á Borgarfirði, Kauptún á Vopnafirði og Kaupfjelagið á Breiðdalsvík eru með í verkefninu. Nú í byrjun er aðeins boðið upp á þurrvörur, en vonir standa til að hægt verði að bæta kæli- og frystivörum við strax í haust. Þá standa einnig vonir til þess að fá stóru búðirnar, Nettó, Bónus og Krónuna með sem allra fyrst.

Eins og staðan er núna þá eru fimm framleiðendur með í verkefninu, en eins of fram kom hér að ofan munu fleiri bætast við þegar kæli- og frystivörur bætast við. Alls hafa 16 framleiðendur líst áhuga á að taka þátt.

Þó verkefnið sé enn smátt í sniðum er það þó hafið og trystum við á að neytendur sýni vörunum áhuga og styðji þannig við matvælaframleiðslu og aðgang að „lókal“ matarhandverki í heimabyggð.

Það verður gaman að sjá verkefnið vaxa og dafna áfram.