Austurland er orðið að vinsælum áfangastað fyrir ferðamenn og sífellt fleiri skemmtiferðaskip eru að boða komu sína austur. Í hittiðfyrra bættist Eskifjarðarhöfn við sem áfangastaður og mikil vöntun er á góðum heimamönnum til að leiðsegja ferðalöngum. Þess vegna fannst Austurbrú nauðsynlegt að koma af stað námi í staðarleiðsögn í vetur.

Námskeiðið er hundrað og tuttugu kennslustundir og á því lærir fólk ýmsa færni í ferðaþjónustu og leiðsögn sem það þarf að búa yfir vilji það leggja fyrir sig leiðsögn. Á námskeiðinu er fjallað um ferðamennsku almennt, náttúrufar, dýralíf, jarðfræði, menningu, atvinnulíf og síðan fá nemendur þjálfun í leiðsögn og skyndihjálp.

Hulda Guðnadóttir, verkefnastjóri, heldur utan um námskeiðið fyrir hönd Austurbrúar og er auk þess einn af kennurum námskeiðsins. Hún hefur mikinn áhuga á ferðamálum og er menntaður ferðamálafræðingur auk þess sem hún hefur lagt stund á frönsku, leiðsögn og kennslu.

„Ég hef starfað sem leiðsögumaður á sumrin frá árinu 2008 eftir að hafa sótt námskeið hjá Þekkingarneti Austurlands sem hét á sínum tíma Ferðaleiðir á Austurlandi. Það var stutt nám fyrir fólk sem hafði áhuga á því að ferðast með fólk úr skemmtiferðarskipunum en síðar tók ég leiðsögunámið hjá EHÍ,“ segir Hulda en hún hefur komið nálægt nokkrum ferðamálatengdum verkefnum hér fyrir austan. Má þar nefna Franska bæinn Fáskrúðsfjörð og menningarhátíðina Franska daga. Jafnframt hefur hún unnið hjá Markaðsstofu Austurlands og fengist við ýmislegt fleira tengt ferðamennsku.

Hvað eru margir skráðir og hverjar eru meginástæður þess að fólk skráir sig í staðarleiðsögunám?

„Tuttugu manns eru skráðir á námskeiðið og nemendur geta sótt það með því að mæta á fyrirlestrana sem eru haldnir í Fjarðabyggð eða með því að vera í fjarfundi í tölvunni heima hjá sér. Það er ýmislegt sem hefur áhrif á þá ákvörðun að skrá sig á svona námskeið. Í fyrsta lagi atvinnutækifæri þ.e. að geta hugsað sér að vinna sem leiðsögumaður á Austurlandi á sumrin. Í öðru lagi fræðandi og skemmtilegt námsefni. Í þriðja lagi, og það skipti marga miklu máli, að geta sótt fyrirlestrana í fjarfundi þar sem margir búa of langt frá starfsstöðvum Austurbrúar og geta þ.a.l. ekki sótt venjulegan fjarfund. Við notumst við kerfi sem heitir Lync þar sem hægt er að fylgjast með heima hjá sér í eigin tölvu. Mjög þægilegt fyrir nemendur.“

Um hvað snúast umræður á svona námskeiði?

„Þær snúast um allt milli himins og jarðar. Margir hafa unnið sem leiðsögumenn áður og geta miðlað reynslu sinni, aðrir hafa mikinn áhuga á að fræðast meira um starfið. Þessi hópur er mjög hress og skemmtilegur og þau hafa margt skemmtilegt til málanna að leggja.“

Og hverjir eru framtíðarmöguleikar nemenda?

„Þeir eru margvíslegir. Þú fræðist um allt sem viðkemur Austurlandi, sögu, náttúru og mannlífi ásamt því að læra leiðsögumannatækni og skyndihjálp. Nemendur geta í framhaldi unnið sem leiðsögumenn, á upplýsingamiðstöðvum eða inn á söfnum á Austurlandi,“ sagði Hulda að lokum.

Gert er ráð fyrir að náminu ljúki í maí á næsta ári. Námið er fjármagnað af Fræðslumiðstöð atvinnulífsins auk þess sem hafnarsjóður Fjarðabyggðar styrkti verkefni um hundrað þúsund krónur.