Austurbrú fékk nýverið styrk til að rannsaka Loftbrúnna, úrræði sem veitir lægri flugfargjöld fyrir íbúa landsbyggðarinnar til og frá höfuðborgarsvæðinu. Reiknað er með að kynna niðurstöður seinni hluta komandi árs.
Loftbrúin hófst fyrir um ári síðan og snýst verkefnið um að kanna viðhorf og reynslu notenda um gildi og hlutverk úrræðisins út frá reynslu notendahópsins s.s. samsetningu hóps, tilgang ferða, fjölda ferða, kosti og annmarka sem og jöfnun aðgengis að þjónustu. Að auki munu rannsakendur skoða ferðir í stærra samgöngusamhengi varðandi ferðir til og frá flugvöllum, hvort ferðast er á einkabílum eða með almenningssamgöngum. Þá verður grennslast fyrir um aðgengisupplifun notenda, upplýsingagjöf, bókanir og ýmislegt fleira.
Samstarfsaðilar Austurbrúar í verkefninu eru Vegagerðin, öll landshlutasamtök sem ná yfir þau póstnúmer sem tilheyra þeim hópi lögheimila sem aðgang hefur að Loftbrúnni, Highlands and Islands Enterprise (HIE) og Transborg Scotland. Austurbrú hefur umsjón með verkefninu og fær til þess ráðgjöf og stuðning allra aðila. Vinna við rannsóknina er þegar hafin og gróf tímaáætlun gerir ráð fyrir að hægt verði að kynna niðurstöður næsta haust.
Verkefnið hlaut styrk upp á sjö milljónir króna sem veittur var á grundvelli stefnumótandi byggðaáætlunar fyrir árin 2021-2022. Markmið með framlögunum er að styðja við áframhaldandi þróun almenningssamgangna um land allt.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn