Sigrún Jóhanna Þráinsdóttir hefur hafið störf hjá Austurbrú sem verkefnastjóri í markaðsteyminu. Hún hóf störf um mánaðarmótin og verður með starfsaðstöðu á Egilsstöðum. Með ráðningu Sigrúnar styrkist enn frekar sú vinna sem lögð er í að efla markaðsstarf Austurlands sem spennandi áfangastaðar fyrir ferðamenn.

Sigrún mun sinna fjölbreyttum verkefnum, meðal annars halda utan um samskipti við samstarfsaðila, sjá um skipulagningu viðburða á borð við Mannamót og haustfund ferðaþjónustunnar á Austurlandi, taka þátt í sölusýningum og sinna öðrum tilfallandi verkefnum á sviði markaðsmála.

„Ég hef langa reynslu úr ferðaþjónustunni og fyrirtækjarekstri á svæðinu,“ segir Sigrún. „Ég tel mig hafa góðan skilning á því krefjandi umhverfi sem ferðaþjónustan starfar við og vona að ég geti nýtt þá þekkingu sem ég hef til að styðja við áframhaldandi uppbyggingu greinarinnar í landshlutanum.“

Sigrún er fædd á Akureyri en ólst að mestu upp í Reykjavík og á Spáni. Hún lauk framhaldsskóla á Egilsstöðum árið 2005 og fluttist aftur austur með fjölskyldu sinni árið 2011. Hún stýrði rekstri 701 Hótels til ársins 2023 og þekkir því vel til ferðaþjónustu auk þess að vera vel staðkunnug.

„Uppbyggingin í ferðaþjónustu á svæðinu hefur verið mikil á undanförnum árum og það hefur verið gaman að fylgjast með henni þróast frá ári til árs,“ segir hún og bætir við: „Við eigum enn mikið inni og ég tel að frábærir hlutir eigi eftir að gerast hér á næstu árum.“

Austurbrú býður Sigrúnu Jóhönnu hjartanlega velkomna til starfa!