Á síðasta stjórnarfundi Sambands sveitarfélaga á Austurlandi (SSA), sem haldinn var 4. júní, samþykkti stjórn ásamt almannavarnarnefnd Austurlands bókun þar sem lýst er alvarlegum áhyggjum af fjarskiptastöðu í fjórðungnum. Tilefnið eru áhyggjur SSA og viðbragðsaðila um stöðu fjarskiptasambands á stofnvegum og við fjölsótta ferðamannastaði.

Í úttekt á stöðu fjarskipta á Austurlandi sem SSA lét vinna fyrr á þessu ári kemur fram að víða sé fjarskiptasamband ófullnægjandi, m.a. á vinsælum ferðamannastöðum á borð við Stuðlagil og Hengifoss en litlar líkur eru á að nýjum sendum verði fjölgað á árinu, þrátt fyrir ítrekaðar ábendingar til stjórnvalda og vaxandi umferðarálags á svæðinu.

Í bókun SSA og almannavarnarnefndar segir meðal annars:

„Samband sveitarfélaga á Austurlandi og almannavarnarnefnd svæðisins kalla eftir því að net fjarskipta á Austurlandi, einkum símasambands, verði þétt. Þetta á ekki síst við fjölsótta ferðamannastaði og vegakerfið, þar sem víða er pottur brotinn.“

Í bókuninni er sérstaklega minnst á banaslys í Stuðlagili sumarið 2023, þar sem slæmt símasamband tafði björgunaraðgerðir. Þá er vísað til annarra atvika þar sem einstaklingar hafa þurft að leita langt eftir sambandi til að kalla eftir aðstoð.

Bókunin lýkur með skýrri áskorun til stjórnvalda:

„SSA og almannavarnarnefnd lýsa þungum áhyggjum af því að sáralitlar líkur virðast á því að fjármagn verði sett í frekari uppbyggingu fjarskiptakerfisins og sendistöðum fjölgað í ár þrátt fyrir stöðuna sem lýst er hér að framan. Skora þau á stjórnvöld að veita auknu fjármagni til að tryggja fjarskipta- og símasamband á fjölsóttum stöðum og vegum og bæta þar með öryggi íbúa og gesta fjórðungsins.“

Nú þegar sumarið gengur í garð og fjöldi ferðamanna heldur austur, kalla SSA og almannavarnir eftir því að brugðist verði við án tafar til að tryggja öryggi vegfarenda í landshlutanum.