Við viljum minna austfirska frumkvöla og sprota á námskeið fyrir byrjendur í umsóknaskrifum í Horizon Europe. Námskeiðin eru ætluð fyrir byrjendur en þó er gengið út frá því að þátttakendur hafi einhverja þekkingu á Horizon Europe, hafi hug á að skrifa umsókn eða séu í umsóknarskrifum. Það er afar gagnlegt að kunna að skrifa góða umsókn. Sú reynsla skilar sér fyrr en síðar hjá öllum sem vilja koma nýjum hugmyndum í framkvæmd!

Námskeiðinu er svo hægt að fylgja eftir með því að sækjast eftir þátttöku á fjárfestingarhátíð Norðanáttar á Siglufirði sem fer fram í þriðja sinn á næsta ári eða þann 20. mars. Fjárfestahátíð Norðanáttar er lokaður viðburður (e. invite only) en tilgangur hátíðarinnar er að auka fjárfestingatækifæri á landsbyggðinni og tengja frumkvöðla við fjárfesta og aðra lykilaðila í stuðningsumhverfi nýsköpunar á Íslandi. Dagskrá hátíðarinnar samanstendur alla jafna af ráðstefnuhluta, fjárfestakynningum, stefnumóti frumkvöðla og fjárfesta og tengslamyndun í lok dags.

Báðir þessir viðburðir eru tilvaldir fyrir austfirska frumkvöðla sem vilja auka færni sína í umsóknarskrifum, stækka tengslanetið og fræðast um nýsköpunarumhverfið.