Sylvía Helgadóttir er einn af sumarstarfsmönnum Austurbrúar. Hún kom til okkar sem verknámsnemi í vor en hún lagði stund á nám í viðburðastjórnun við Háskólann á Hólum og er nýútskrifuð. Lokaverkefnið vann hún fyrir austan en hún skipulagði Umhverfisdaga í Fljótsdal sem haldnir voru með pompi og prakt í apríl. Hún vinnur hjá okkur í sumar að ýmis konar markaðs- og kynningarverkefnum og stefnir á frekara nám í haust.
Sylvía er fædd árið 1991 á Austurlandi og hjarta hennar slær í Fellabæ. Hún bjó fyrir sunnan á árunum 1999 til 2016 og segist vera „borgarbarn með sveitablóð í æðum.“ Hún er mikið náttúrubarn og finnst fátt betra en góður göngutúr með hundunum sínum eða skoðunarferðir með manninum. „Þegar ég flutti austur aftur var ég komin heim,“ segir hún.
„Haustið 2019 datt mér í hug að taka námsbrautina Verkefnastjórnun og leiðtogaþjálfun,“ segir Sylvía. „Ég kláraði námið vorið 2020 með vottun í verkefnastjórnun og út frá þeirri námsleið ákvað ég að nú skildi ég stefna á háskólanám. Til þess þurfti ég fyrst að ljúka grunni til að komast inn í háskóla. Ég sótti því um nám við háskólagátt hjá Bifröst en hafði áhyggjur af því að það yrði of lítið að gera hjá mér – ég þarf nefnilega að hafa nóg að gera – og sótti því líka um diplómunám í viðburðastjórnun í Háskólanum á Hólum.
Háskólagátt Bifrastar býr nemendur undir nám á háskólastigi og er aðfaranám skólans inn í grunnnámslínur. Diplómunám í viðburðastjórnun gerir nemendur hinsvegar færari í að skipuleggja, fjármagna og stýra viðburðum frá upphafi til enda. „Það er mikil samþætting hagnýtra og fræðilegra þátta í viðburðastjórnun og auðvitað margt vitlausara en að læra viðburðastjórnun í miðjum heimsfaraldri,“ segir Sylvía kímin og bætir við: „Ég lærði mikið á þessum stutta tíma og ég held að nemendur sem voru í námi 2020-2021 hafi lært mikið á þessu ástandi. Þetta kenndi okkur að vera fljótir að hugsa og takast á við snöggar breytingar.“
Sylvía hóf upphaflega störf hjá okkur sem verknámsnemi í Fljótsdal þar sem hún aðstoði við framkvæmd verkefnisins Fögur framtíð í Fljótsdal og skipulagði m.a. umhverfisdaga í Fljótsdal sem fóru fram í apríl. Hvernig kom það til?
„Það var nú svolítið fyndið hvernig þetta þróaðist allt saman,“ svarar hún.
„Ég sá stöðu verkefnastjóra í verkefnið Fögur framtíð í Fljótsdal auglýsta á sínum tíma (árið 2019) og það var eitthvað við þessa auglýsingu sem ýtti af stað þessari atburðarás. Ég sótti sem sagt um þetta nám í verkefnastjórnun og leiðtogaþjálfun en endaði svo sem verknámsnemi í viðburðastjórnun undir leiðsögn Ásdísar Helgu. Þegar kom að því að sækja um verknámsstað datt mér ekki annað í hug en að setja mig í samband við Ásdísi Helgu [Bjarnadóttur, verkefnastjóra Fagrar framtíðar í Fljótsdal] enda hafði ég fylgst með hennar störfum af miklum áhuga.“
Umhverfisdagar voru ekki fyrsta hugmynd Sylvíu að lokaverkefni. Upphaflega stóð til að skipuleggja viðburð með tónlistarmanninum Svavari Knúti. Hugmyndin var sú að hann stæði fyrir kvöldvöku og námsskeiði ætlað börnum sem hefðu áhuga á kvæðum og/eða lagasmíðum. Því miður þurfti að fresta heimsókninni en í staðinn voru skipulagðir fyrrnefndir Umhverfisdagar í Fljótsdal.
Nánar um Umhverfisdaga í FljótsdalUmhverfisdagarnir í Fljótsdal voru lokaverkefni Sylvíu í Háskólanum á Hólum og hún útskrifaðist fyrr í vikunni. Í millitíðinni sótti hún um sumarstarf hjá Austurbrú og sinnir í dag alls konar verkefnum, einkum á sviði markaðssetningar og kynningarmála. Í haust stefnir hún á frekara nám og hefur skráð sig í tölvunarfræði hjá HR.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn