Nýr yfirverkefnastjóri
Ásdís Helga Bjarnadóttir er nýr yfirverkefnastjóri hjá Austurbrú en hennar helstu verkefni verða á sviði fræðslumála. Hún tekur við af Guðrúnu Á. Jónsdóttur sem gengt hefur starfinu síðan 2015. Starfið var auglýst í fyrrasumar og var henni boðin staðan í haust að loknu umsóknarferli. Tók hún við starfinu formlega um áramótin.
Árangursríkur tími í Fljótsdal
Ásdís hóf störf hjá Austurbrú árið 2019 og tók þá við verkefnisstjórn Fagurrar framtíðar í Fljótsdal, samfélagsþróunarverkefnis sem Austurbrú hefur stýrt með samfélagsnefnd Fljótsdalshrepps. Verkefninu er hvergi lokið þótt Ásdís hverfi nú til annarra starfa en framtíðaráform munu skýrast betur á næstu vikum og mánuðum. Hún segir að þetta hafi verið afar ánægjulegur tími. „Íbúarnir hafa verið virkir og það skiptir mestu máli,“ segir hún. „Fram hafa komið öflugir frumkvöðlar en þannig hafa sjö ný fyrirtæki verið skráð, nýjar fljótsdælskar vörur hafa komið á markað og byggt hefur verið nýtt íbúðarhúsnæði og unnið að endurbótum á öðrum. Þá hefur verið reist fjórtán herbergja hótel á þessum tíma.“
Nánar
Mikið framundan
Framundan er mikill lærdómstími hjá Ásdísi en starf yfirverkefnastjóra hjá Austurbrú er ansi fjölþætt og verkefnin mörg. „Þetta leggst mjög vel í mig og er virkilega spennandi,“ segir hún. „Það mun taka nokkurn tíma að komast inn í öll verkefnin því að þótt að ég hafi unnið í um ellefu ár innan endurmenntunar og við þróun námslína hjá Landbúnaðarháskóla Íslands og Umhverfisstofnun er umfangið talsvert annað og markhóparnir fjölbreyttari hjá Austurbrú.“
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
