Matarmót Austurlands verður haldið í Sláturhúsinu á Egilsstöðum á morgun, laugardaginn 14. nóvember. Þar koma saman austfirskir matvælaframleiðendur, stórir sem smáir, til að kynna og selja afurðir sínar. Aðgangur er ókeypis og öll velkomin.

Matarmótið er haldið í sjötta sinn í ár og hefur fest sig í sessi sem árlegur viðburður þar sem gestir geta kynnt sér fjölbreytta matvælaframleiðslu á Austurlandi, hitt fólkið á bak við vörurnar og verslað beint við framleiðendur. Í fyrra sóttu um þúsund gestir mótið og voru sýnendur um þrjátíu talsins.

Á Matarmótinu gefst gestum tækifæri til að skoða og kaupa fjölbreyttar austfirskar matvörur, fræðast um framleiðsluna og jafnvel smakka ýmsar afurðir. Viðburðurinn er jafnframt mikilvægur vettvangur fyrir framleiðendur til að kynna vörur sínar, mynda tengsl og skapa ný viðskiptatækifæri.

Mikilvægt að styðja við framleiðendur í heimabyggð

Hallormsstaðaskóli sér um skipulagningu Matarmótsins með aðstoð Austurbrúar við skráningar og markaðssetningu. Myrra Mjöll Daðadóttir, forstöðumaður Hallormsstaðaskóla, segir mótið mikilvægan vettvang fyrir austfirska matvælaframleiðendur og almenning.

„Það sem gerir Matarmótið sérstakt er að það skapar meðvitund um fjölbreytni matvælaframleiðslu á Austurlandi,“ segir Myrra.

Hún bendir á að mótið gefi framleiðendum, stórum sem smáum, tækifæri til að kynna og selja vörur sínar milliliðalaust og eiga samtal við viðskiptavini. Um leið geti gestir kynnt sér framleiðsluna og stutt við atvinnustarfsemi í heimabyggð.

Matarmótið tengist jafnframt starfsemi Hallormsstaðaskóla, þar sem löng hefð er fyrir vinnu með staðbundin hráefni, matarhefðir og matarnýsköpun. Við skólann er starfrækt vottað tilraunaeldhús sem nýtist meðal annars smáframleiðendum við vöruþróun.

Nánari upplýsingar um Matarmótið má finna á https://austurland.is/matarmot/.