Íslenskukennsla á vinnustaðnum
Með námsleiðinni Íslenska og atvinnulíf fá þátttakendur tækifæri til að efla íslenskukunnáttu og styrkja stöðu sína í daglegu lífi og á vinnumarkaði.
Íslenska og atvinnulíf – ný námsleið hafin hjá Austurbrú
Námskeiðið Íslenska og atvinnulíf er nú hafið hjá Austurbrú, en um er að ræða námsleið frá Fræðslumiðstöð atvinnulífsins sem miðar að því að styðja fólk af erlendum uppruna í að efla íslenskukunnáttu sína, kynnast íslenskum vinnumarkaði og átta sig betur á uppbyggingu samfélagsins.
Námskeiðið er haldið í samstarfi við Alcoa Fjarðaál og eru allir þátttakendur starfsmenn fyrirtækisins. Kennslan fer fram á vinnutíma og er lögð áhersla á íslensku, íslenskt atvinnulíf og uppbyggingu sjálfstrausts og samskiptafærni.
Hópurinn hittist einu sinni í viku í húsnæði Austurbrúar og er þar heilan kennsludag, frá kl. 8:00 til 15:30. Námið stendur yfir í átta vikur og fyrstu sex vikurnar er kennslan blönduð, þar sem farið er yfir íslensku, atvinnulíf og sjálfstraust og samskiptafærni samhliða.
Alls taka tíu einstaklingar þátt í náminu, sex konur og fjórir karlar, af fimm þjóðernum: Belgíu, Kanada, Spáni, Póllandi og Úkraínu. Öll kennsla fer fram á íslensku og þurfa þátttakendur því að hafa grunn í málinu til að geta tekið þátt. Markmiðið er að þátttakendur öðlist aukið öryggi í að nota íslenskuna í daglegu lífi og á vinnustað.
Aukið sjálfstraust og skilningur
Í náminu fá þátttakendur meðal annars fræðslu frá AFL og um lífeyrissjóðsmál í samstarfi við Stapa lífeyrissjóð. Að loknu námi er markmiðið að þátttakendur hafi bætt íslenskukunnáttu sína, byggt upp sjálfstraust í samskiptum og öðlast betri skilning á íslensku atvinnulífi og samfélagi. Stefnt er að því að bjóða öðrum hópi starfsmanna Alcoa upp á sömu námsleið haustið 2026. Samhliða þessu heldur Austurbrú áfram að bjóða upp á fjölbreytt íslenskunámskeið víðs vegar um Austurland. Um þessar mundir eru tíu námskeið auglýst á heimasíðu Austurbrúar, þar af eitt fjarnámskeið þar sem megináhersla er á talað mál.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
