Prófaþjónusta Austurbrúar gegnir mikilvægu hlutverki í því að tryggja íbúum Austurlands jafnt aðgengi að námi óháð búsetu. Á skólaárinu 2025–2026 sá Austurbrú um framkvæmd 744 prófa fyrir 350 próftaka víðs vegar um fjórðunginn og sýna niðurstöður nýrrar könnunar að notendur þjónustunnar eru afar ánægðir með hana.

Prófaþjónusta Austurbrúar er umfangsmikið verkefni sem felur meðal annars í sér móttöku og meðhöndlun prófa, skönnun og skil á prófúrlausnum og örugga meðferð persónugreinanlegra gagna. Megnið af prófahaldi fer fram á starfsstöðvum Austurbrúar á Egilsstöðum, Reyðarfirði, í Neskaupstað, á Djúpavogi og á Vopnafirði. Þá hefur Austurbrú jafnframt komið til móts við nemendur með því að skipuleggja próftöku í samstarfi við aðila á öðrum stöðum þegar aðstæður kalla á það, til dæmis á Seyðisfirði þegar Fjarðarheiði er ófær og á Borgarfirði eystra þegar þörf hefur verið á.

Háskólanemar eru stærsti hópur próftaka hjá Austurbrú en þjónustan nær einnig til framhaldsskólanema, þátttakenda í ríkisborgaraprófum og fólks sem sækir sérhæfð réttinda- og starfspróf. Langflest próf tengdust Háskólanum á Akureyri, sem stóð fyrir tæplega helmingi allra prófa á árinu, en þar á eftir komu Háskóli Íslands og Háskólinn í Reykjavík.

Reyðarfjörður og Egilsstaðir voru áfram stærstu prófstaðir Austurbrúar og voru þar tekin samanlagt tæplega 80% allra prófa. Minni prófstaðir og sérlausnir gegna þó áfram mikilvægu hlutverki við að tryggja aðgengi nemenda að próftöku í heimabyggð og draga úr þörf fyrir löng ferðalög vegna náms.

Til að fá betri mynd af upplifun notenda var send út könnun meðal próftaka eftir vorönn 2026. Alls bárust 28 svör og voru niðurstöðurnar afar jákvæðar. Meðaleinkunn fyrir heildarupplifun af prófaþjónustunni var 9,1 af 10 og gáfu 22 af 28 svarendum þjónustunni hæstu mögulegu einkunn.

Í opnum svörum nefndu próftakar sérstaklega góða þjónustu, faglegt viðmót starfsfólks, rólegt prófumhverfi og gott aðgengi. Margir lögðu áherslu á mikilvægi þess að geta tekið próf í heimabyggð í stað þess að þurfa að ferðast langar leiðir til annarra landshluta. Athugasemdir um úrbætur voru fáar og sneru helst að smávægilegum atriðum varðandi upplýsingar eða aðstöðu.

Niðurstöðurnar undirstrika mikilvægi prófaþjónustu Austurbrúar sem hluta af menntaþjónustu á Austurlandi. Með öflugri og sveigjanlegri prófaþjónustu um fjórðunginn skapast betri forsendur fyrir íbúa til að stunda nám og sækja sér aukna menntun án þess að búseta verði hindrun á þeirri vegferð.

• Nánari upplýsingar