Alls bárust 20 umsóknir í Frumkvæðissjóð Sterks Stöðvarfjarðar í síðustu úthlutun sjóðsins og hlutu 18 verkefni styrk. Heildarupphæð úthlutunar nam 14.950.000 krónum.

Verkefnin sem styrk hlutu eru fjölbreytt og endurspegla frumkvæði, metnað og vilja til uppbyggingar í samfélaginu. Þau spanna ólík svið – allt frá styrkingu atvinnulífs og nýsköpunar á grunni sjálfbærni til menningar- og samfélagsverkefna, auk innviðaverkefna sem bæta þjónustu og aðstöðu á Stöðvarfirði.

Frumkvæðissjóðurinn er hluti af verkefninu Brothættar byggðir – Sterkur Stöðvarfjörður, sem hófst árið 2022 og byggir á vinnu með íbúum og þeirri framtíðarsýn sem mótuð var á íbúaþingi sama ár. Markmið sjóðsins hefur verið að styðja hugmyndir á byrjunarstigi og gera fólki kleift að hrinda verkefnum í framkvæmd sem styrkja samfélagið og skapa ný tækifæri.

Frá upphafi hafa 81 verkefni hlotið styrk úr sjóðnum og samtals hefur verið úthlutað tæpum 52 milljónum króna. Verkefnin hafa verið sprottin upp úr hugmyndum og þörfum íbúa og mörg þeirra haft jákvæð áhrif á atvinnulíf, menningu og samfélagslíf á Stöðvarfirði.

Með þessari úthlutun lýkur starfsemi sjóðsins sem á undanförnum árum hefur verið mikilvægur farvegur fyrir frumkvæði og nýjar hugmyndir í samfélaginu.

Verkefni sem hlutu styrk

• Örn Ingólfsson – Uppsetning á varmadælum / tækjakaup — 250.000 kr.

• Úlfar Atli Mörk – LóðarMörk — 250.000 kr.

• Sköpunarmiðstöðin – Workshops — 250.000 kr.

• Brauðdagar Deighús – Efling vörumerkis — 300.000 kr.

• Áhugahópur um fornleifar á Stöðvarfirði – Merking fyrir eldstæði og nytjaholu — 350.000 kr.

• Saga Unnsteinsdóttir – Beðið (a flower bed / waiting) 2026 — 400.000 kr.

• Le Temple ehf. – Aðlögun húsnæðis að heilsársferðaþjónustu — 450.000 kr.

• Dominika Janus – Tenderberry – scent and lights from the Eastfjords — 500.000 kr.

• Salthúsmarkaðurinn á Stöðvarfirði – Sjáumst á Salthúsmarkaðinum — 600.000 kr.

• Skemmtifélag Stöðvarfjarðar – Bæjarhátíðin Støð í Stöð — 800.000 kr.

• Þóra Björk Nikulásdóttir – Sultur og sælgæti — 800.000 kr.

• Brauðdagar Deighús – Rauðu símaklefarnir á Stöðvarfirði – matarafhending — 1.000.000 kr.

• Ferðaþjónustan Fossárdal – Betra tjaldsvæði — 1.000.000 kr.

• Skemmtifélag Stöðvarfjarðar – Samfélagsverkefni félagsins — 1.200.000 kr.

• Stúarafélagið ehf. – Safnið hans Tona – Rauða húsið — 1.200.000 kr.

• Kaffibrennslan Kvörn ehf. – Tæknivæðing framleiðslu og umhverfisumbætur — 1.300.000 kr.

• Þórhallur Ingimar Atlason – Pönkprent / endurprent — 2.000.000 kr.

• Sköpunarmiðstöðin – Fræ – Sköpunareldhús — 2.300.000 kr.

Að lokinni úthlutun ávarpaði Jóna Árný Þórðardóttir, bæjarstjóri Fjarðabyggðar, styrkþega og þakkaði fyrir áhugaverð og metnaðarfull verkefni sem sýndu þann kraft og frumkvæði sem býr í samfélaginu. Hún hvatti styrkþega til að fylgja hugmyndum sínum eftir af krafti og nýta styrkina til að láta verkefnin vaxa og hafa jákvæð áhrif á samfélagið á Stöðvarfirði.