Nýr þáttur er kominn í loftið í Austurland hlaðvarp og að þessu sinni er sjónum beint að safnastarfi á Austurlandi. Tilefnið er málþing um söfn og safnastarf sem fram fer mánudaginn 20. apríl á Egilsstöðum.

Undanfarið hefur verið fjallað um málþingið á vef Austurbrúar og rætt við fólk sem kemur að safnastarfi með ólíkum hætti. Þar á meðal er Guðrún Rúnarsdóttir sem hefur starfað við bókasafnið á Reyðarfirði í yfir tvo áratugi. Hún lýsti því t.d. hvernig hlutverk bókasafna hefur breyst úr því að vera fyrst og fremst útlánastaðir yfir í opin samfélagsrými þar sem fólk hittist, tengist og tekur þátt.

Í þættinum verður rætt við Guðrúnu en það verður einnig rætt við Signýju Ormarsdóttur hjá Austurbrú sem hefur haft veg og vanda af undirbúningi málþingsins. Hún segir mikilvægt að skapa vettvang fyrir samtal um stöðu safna á Austurlandi og tækifæri til frekari uppbyggingar. Það er rætt við Elsu Guðnýju Björgvinsdóttur sem mun leiða inn í vinnustofur á málþinginu. Hún býr yfir víðtækri reynslu úr safnastarfi. Þá er einnig rætt við Hlín Gylfadóttur hjá Borgarsögusafni Reykjavíkur um samfélagsverkefni safna og hvernig þau geta styrkt tengsl ólíkra hópa. Loks er spjallað við Þórhildi Tinnu Sigurðardóttur sem segir frá uppbyggingu við Stríðsárasafnið á Reyðarfirði þar sem umfangsmiklar framkvæmdir standa yfir og nýjar sýningar eru í undirbúningi.

Þátturinn gefur góða innsýn í þá þróun sem á sér stað í safnamálum og hversu mikilvægu hlutverki söfn og sýningar gegna á Austurlandi í dag.

• Hlusta á þáttinn. 

Málþing um söfn og bókasöfn á Austurlandi fer fram 20. apríl og eru öll áhugasöm hvött til að mæta.

• Nánari upplýsingar um málþingið.