Flugið breytir stöðunni
Ráðstefna um hlutverk Egilsstaðaflugvallar og framtíð flugsamgangna fer fram 30. apríl á Egilsstöðum.
Sjá dagskrá og skráninguLykill að frekari verðmætasköpun á Austurlandi
Það er ekki sjálfgefið að svæði með innan við þrjú prósent þjóðarinnar standi undir fjórðungi útflutningstekna landsins. „Austurland er nú þegar eitt öflugasta útflutningssvæði landsins,“ segir Sigga Dögg Guðmundsdóttir, forstöðumaður útflutnings og fjárfestinga hjá Íslandsstofu, og segir að tækifærin til frekari vaxtar séu til staðar. Hún verður með erindi á ráðstefnu um hlutverk Egilsstaðaflugvallar sem fram fer 30. apríl.
Sigga Dögg segir tækifæri Austurlands í útflutningi veruleg en að bættar flugsamgöngur geti skipt sköpum fyrir áframhaldandi vöxt.
„Austurland er nú þegar eitt öflugasta útflutningssvæði landsins og stendur undir um fjórðungi vöruútflutningstekna Íslands þrátt fyrir að þar búi innan við 3% þjóðarinnar,“ segir hún og vísar þar til nýlegrar efnahagsgreiningar SSA.
Hún segir að þessi staða hafi verið augljós í heimsókn hennar austur fyrr á árinu.
„Það sem stóð upp úr var hversu mikil uppbyggingin er og ekki síður sá kraftur og metnaður sem ríkir til að skapa enn meiri verðmæti. Tækifærin felast í að byggja áfram á þessum sterka grunni og auka verðmætasköpun enn frekar í lykilgreinum svæðisins.“
Styttri leið á markaði
Að mati Siggu Daggar gegna flugsamgöngur lykilhlutverki í þessari þróun, sérstaklega fyrir svæði sem byggir svo mikið á útflutningi. „Flugsamgöngur geta haft mikilvægt hlutverk fyrir svæði sem er jafn útflutningsdrifið og Austurland, þar sem fyrirtæki starfa á alþjóðlegum mörkuðum og fjarlægðir frá helstu mörkuðum skipta máli,“ segir hún.
Hún bendir á að áhrifin séu bæði bein og óbein:
„Bættar flugsamgöngur stytta leiðir á markaði, auka fyrirsjáanleika og auðvelda samskipti við viðskiptavini, samstarfsaðila og fjárfesta. Með beinu millilandaflugi opnast aukin tækifæri til að styrkja tengingar svæðisins við umheiminn og efla samkeppnisstöðu þess,“ segir Sigga Dögg.
Flugsamgöngur hluti af lykilinnviðum
Á ráðstefnunni um hlutverk Egilsstaðaflugvöllar mun Sigga Dögg leggja áherslu á að flugið sé ekki aukaatriði heldur hluti af grunninnviðum útflutnings.
„Austurland er þegar lykilsvæði í útflutningi Íslands og hefur burði til að vaxa enn frekar,“ segir hún og hún bætir við:
„Á sama tíma er mikilvægt að horfa á flugsamgöngur sem lykilinnviði fyrir útflutning og alþjóðlega tengingu, ekki síður en hafnir og stafræna innviði.“
Reynslan af samtölum við fyrirtæki í landshlutanum styðji þetta mat. „Þróun flugsamgangna getur haft veruleg áhrif á samkeppnishæfni og aðgengi að mörkuðum,“ segir Sigga Dögg.
Raunveruleg tækifæri framundan
Aukin tenging um Egilsstaði geti því haft víðtæk áhrif, langt út fyrir svæðið sjálft.
„Með auknum tengingum um Egilsstaðaflugvöll felast raunveruleg tækifæri til að auka verðmætasköpun og styrkja alþjóðlega stöðu Austurlands,“ segir Sigga Dögg.
„Það hefur ekki aðeins áhrif á svæðið sjálft heldur íslenskt efnahagslíf í heild.“
Ráðstefnan um hlutverk Egilsstaðaflugvöllur fer fram 30. apríl og hefst kl. 13:00 í Valaskjálf á Egilsstöðum. Þar munu lykilaðilar í flugi, atvinnulífi og ferðaþjónustu fjalla um tækifæri og áskoranir í þróun flugsamgangna og tenginga Austurlands við umheiminn.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
