Góð þátttaka var á opinni vinnustofu undir yfirskriftinni Menning og ferðaþjónusta á Austurlandi sem fram fór í Sláturhúsinu á Egilsstöðum þann 8. maí síðastliðinn. Markmið vinnustofunnar var að efla samtal og samstarf milli aðila í menningarstarfi, safnastarfsemi og ferðaþjónustu á Austurlandi með sjálfbæra þróun að leiðarljósi.

Þátttakendur komu víðs vegar að af Austurlandi og dagskráin var fjölbreytt. Guðrún Dröfn Whitehead kynnti niðurstöður könnunar í upphafi dags en í kjölfarið fóru fram tvær pallborðsumræður. Þar var annars vegar fjallað um möguleika í samstarfi innan svæða og hins vegar um áskoranir og möguleg úrræði í samstarfi menningar og ferðaþjónustu.

Meðal þátttakenda í pallborðum voru fulltrúar frá Skriðuklaustri, Sláturhúsinu, Minjasafni Austurlands, Austurbrú og ferðaþjónustufyrirtækjum á svæðinu. Pallborðsstjórar voru Elsa Guðný Björgvinsdóttir, deildarstjóri menningarmála hjá Múlaþingi, og Jóhannes Þór Skúlason, framkvæmdastjóri Samtaka ferðaþjónustunnar.

Hjalti Már Einarsson, framkvæmdastjóri Datera, flutti einnig hagnýtan fyrirlestur um markaðssetningu menningarstofnana og mikilvægi sýnileika og miðlunar í síbreytilegu umhverfi ferðaþjónustunnar.

Í lok dags fór fram svokallaður „speed-dating“ viðburður þar sem þátttakendur tóku þátt í stuttum vinnustofum og ræddu hugmyndir sínar í smærri hópum. Hugmyndir og áherslur voru skráðar niður í sameiningu með það að markmiði að efla tengslamyndun og skapa grunn að frekara samstarfi.

Heimsóknir á söfn eru meðal vinsælustu afþreyingar ferðamanna á Íslandi og því var lögð áhersla á mikilvægi aukinnar samvinnu milli safna, menningarstofnana og ferðaþjónustuaðila á Austurlandi.

Rannsóknasetrið í safnafræði, Rannsóknamiðstöð ferðamála (RMF), Félag íslenskra safna og safnafólks (FÍSOS), Samtök Ferðaþjónustunnar (SAF) og Síldarminjasafnið á Siglufirði stóðu fyrir viðburðinum. Það er von aðstandenda að viðburðurinn hafi orðið þátttakendum innblástur og hvati að áframhaldandi samstarfi og nýjum verkefnum á sviði menningar og ferðaþjónustu.