Á Nýsköpunarvikunni í Reykjavík komu saman frumkvöðlar, fjárfestar og fólk úr stuðningsumhverfi nýrra hugmynda. Þar stóðu landshlutasamtökin og Byggðastofnun fyrir viðburði í Grósku undir merkjum Startup Landsins, nýsköpunarhraðals fyrir frumkvöðla á landsbyggðinni.

Fulltrúi Austurlands á viðburðinum var Sæunn Vigdís Sigvaldadóttir, býflugnabóndi í Hallormsstaðaskógi. Hún er gestur nýjasta þáttar Austurland hlaðvarps þar sem hún segir frá býflugunum, frumkvöðlaverkefninu sínu og því hvernig hugmynd sem kviknaði á Nýja-Sjálandi fyrir rúmum tuttugu árum er nú orðin að atvinnu, vöruþróun og langtímasýn á Austurlandi.

Sæunn er þroskaþjálfi og kennari að mennt og hefur komið víða við. Hún hefur ferðast um heiminn, unnið fjölbreytt störf, framleitt osta og starfað í félagsþjónustu. Í þættinum segir hún skemmtilega frá því hvernig þessi reynsla nýtist henni öll í býflugnaræktinni. Þroskaþjálfinn fylgist með hegðun, kennarinn hugsar nokkur skref fram í tímann, ostagerðarkonan kann að vinna með afurðir og ferðalangurinn hefur lært þolinmæði og útsjónarsemi.

Verkefni Sæunnar snýst þó ekki bara um hunang, enda getur íslenskt veður gert býflugnaræktina óútreiknanlega. Hún vinnur fjölbreyttar vörur úr afurðum býflugnanna, meðal annars varasalva, handáburð, bývaxvefjur utan um matvæli, viðarvörn og vörur fyrir hunda. Handáburðurinn ber til dæmis nafnið Handagagn eftir að eiginmaður hennar, sem hún lýsir sem „gagnlegri efasemdarödd“ á heimilinu, komst að þeirri niðurstöðu að „það væri gagn að þessu.“