Alls útskrifuðust 18 einstaklingar úr framhaldsnámi í stóriðju fimmtudaginn 30. apríl síðastliðinn. Sama dag kynntu nemendur lokaverkefnin sín fyrir samstarfsfólki í álverinu.

Stóriðjuskólinn er eitt af lykilverkefnum Austurbrúar og er rekið í nánu samstarfi við Alcoa Fjarðaál. Námið er ætlað starfsfólki sem lokið hefur grunnnámi í stóriðju og vill efla hæfni sína enn frekar. Með útskriftinni hefur hópurinn lokið bæði grunn- og framhaldsnámi sem samanlagt telur alls 900 klukkustundir.

Framhaldsnámið er 500 klukkustundir að lengd og má meta til allt að 25 eininga á framhaldsskólastigi. Í náminu er tvinnað saman bóklegt nám, verklega þjálfun og raunhæf verkefni á vinnustað með áherslu á öryggi, gæði, verkferla, tækni og umbótastarf.

Lokaverkefni nemenda byggðu á raunverulegum viðfangsefnum úr starfsemi fyrirtækisins og var þeim ætlað að dýpka faglega þekkingu þátttakenda og styðja við umbætur á vinnustaðnum. Markmið námsins er meðal annars að auka færni, styrkja starfs- og samskiptahæfni, efla öryggisvitund og stuðla að aukinni starfsánægju og verðmætasköpun í stóriðju á Austurlandi.

Næsta vetur verður tekin inn nýr hópur í framhaldsnám Stóriðjuskólans. Sá hópur samanstendur af nemendum sem luku grunnnámi í lok síðasta árs.

Meðfylgjandi myndir voru teknar af Hilmari Sigurbjörnssyni við útskriftina.