BRAS, bókasöfn og ritlistarsmiðjur fá styrki
BRAS, bókasöfn og ritlistarsmiðjur á Austurlandi eru meðal þeirra verkefna sem hlutu styrki úr menningarsjóðum stjórnvalda í ár. Styrkirnir styðja við fjölbreytt menningarverkefni fyrir börn og ungmenni og efla aðgengi að skapandi starfi og menningu um landshlutann.
Ríflega níu milljónir til menningarverkefna á Austurlandi
Austurland hlaut nýverið alls 9,1 milljón króna í styrki úr tveimur menningarsjóðum á vegum stjórnvalda. Úthlutanirnar fóru fram sunnudaginn 31. maí í Gömlu kartöflugeymslunni í Elliðaárdal og runnu styrkirnir til verkefna sem efla barnamenningu, skapandi starf og aðgengi að menningu á Austurlandi.
Hæsti styrkurinn fór til barna- og ungmennahátíðarinnar BRAS sem hlaut 6 milljónir króna úr Barnamenningarsjóði fyrir verkefnið Undur og furða. BRAS hefur um árabil verið einn af stærstu vettvöngum barnamenningar á Austurlandi og stendur að fjölbreyttum viðburðum fyrir börn og ungmenni um allan landshlutann.
Auk þess hlutu tvö verkefni á Austurlandi styrki úr Bókasafnasjóði 2026.
Bókasöfn Fjarðabyggðar fengu 2 milljónir króna fyrir verkefnið Bókasöfn á menningarhátíðum Fjarðabyggðar. Verkefnið miðar að því að efla sýnileika bókasafna sveitarfélagsins og styrkja hlutverk þeirra sem opins og aðgengilegs menningar- og fræðslurýmis fyrir alla íbúa. Áætlað er að halda opna viðburði á bókasöfnum í tengslum við menningarhátíðirnar Innsævi, BRAS og Daga myrkurs.
Múlaþing hlaut 1,1 milljón króna fyrir verkefnið Sögusmiðju, skapandi ritlistasmiðju fyrir börn og unglinga. Þar munu rithöfundar leiða ritlistarsmiðjur fyrir aldurshópana 9–12 ára og 12–15 ára þar sem þátttakendur kynnast aðferðum sagnagerðar og vinna að eigin textum í skapandi og hvetjandi umhverfi.
Alls bárust 142 umsóknir í Barnamenningarsjóð og var sótt um rúmlega 441 milljón króna, en úthlutað var styrkjum til 43 verkefna um allt land. Þá bárust Bókasafnasjóði 23 umsóknir og var úthlutað 19 milljónum króna til níu verkefna.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
