Aldarfjórðungur í þjónustu menningarlífsins
Signý Ormarsdóttir, verkefnastjóri menningar hjá Austurbrú, er gestur nýjasta þáttar Austurland hlaðvarps. Þar lítur hún til baka á rúmlega tveggja áratuga starf í menningarmálum á Austurlandi en hún lætur nú af störfum eftir að hafa starfað að uppbyggingu menningarlífs í fjórðungnum frá árinu 2002.
Í þættinum rifjar Signý upp hvernig Austurland varð brautryðjandi á sviði menningarmála. Austfirðingar voru fyrstir landshluta til að stofna sjálfstætt menningarráð og gera sérstakan menningarsamning við ríkið. Starf menningarfulltrúa Austurlands var jafnframt hið fyrsta sinnar tegundar á Íslandi.
Signý segir að eitt mikilvægasta hlutverk sitt hafi verið að horfa á menningarlífið sem þróunarverkefni; að fylgjast með samfélaginu, styðja ný verkefni og efla fjölbreytni. Hún nefnir að á þessum tíma hafi margt breyst til hins betra. Menningarmiðstöðvum hafi fjölgað, starfandi listamönnum fjölgað og tengsl Austurlands við innlendar og alþjóðlegar menningarstofnanir styrkst.
Þrátt fyrir framfarir telur Signý að enn séu tækifæri til staðar. Hún nefnir meðal annars mikilvægi þess að efla skapandi starf barna og ungmenna, styrkja menningarstjórnsýslu sveitarfélaga og skapa fleiri tækifæri fyrir atvinnulistafólk til að starfa og miðla þekkingu sinni í skólum og samfélögum víðs vegar um Austurland.
Síðasta stóra verkefni hennar hjá Austurbrú er ráðstefnan Skapandi Austurland sem fram fer á Eskifirði 11. júní. Þar verður fjallað um stöðu, tækifæri og framtíð lista og menningar í landsbyggðunum með þátttöku fulltrúa menningarlífs, rannsókna, sveitarfélaga og stjórnvalda.
Að loknum störfum hyggst Signý einbeita sér að eigin sköpun en segir þó Austurland aldrei langt undan.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
