Menning sem forsenda byggðaþróunar
Drög að nýrri menningarstefnu Austurlands verða kynnt á ráðstefnunni Skapandi Austurland. Stefnan leggur áherslu á menningu sem lykilþátt í búsetu, samfélagsþróun og framtíð Austurlands.
Ný menningarstefna Austurlands kynnt
Drög að nýrri menningarstefnu Austurlands fyrir árin 2026–2030 verða kynnt á ráðstefnunni Skapandi Austurland sem fram fer í Gamla barnaskólanum á Eskifirði fimmtudaginn 11. júní. Stefnan er nú í vinnslu og er kynningin liður í áframhaldandi samtali um framtíð lista og menningar á Austurlandi.
Það verða Signý Ormarsdóttir, verkefnastjóri menningarmála hjá Austurbrú, og Eva Jörgensen, verkefnastjóri rannsókna, háskólamála, og samfélagsþróunar, sem kynna drögin og helstu áherslur þeirra. Menningarstefnan er unnin af Austurbrú fyrir Samband sveitarfélaga á Austurlandi (SSA) og tekur til alls landshlutans. Markmiðið er að skapa sameiginlegan ramma um uppbyggingu lista- og menningarmála á Austurlandi og styrkja tengsl þeirra við byggðaþróun, samfélag og atvinnulíf.
„Við viljum að menning sé sýnileg sem hluti af innviðum samfélagsins. Hún hefur áhrif á búsetu, lífsgæði, sjálfsmynd og aðdráttarafl svæðisins og er því mikilvægt byggðamál,“ segir Signý Ormarsdóttir.
Í drögunum er lögð áhersla á að menning sé ekki einungis afþreying heldur ein af forsendum þess að fólk velji að setjast að, búa áfram eða snúa aftur heim. Stefnan byggir á samtali við hagaðila og tengist meðal annars Svæðisskipulagi Austurlands og Sóknaráætlun Austurlands.
Skapandi Austurland
Meðal þeirra áherslna sem fram koma í drögunum eru stuðningur við grasrót og listafólk, efling menningarmiðstöðva og menningarstofnana, aukin áhersla á barnamenningu, varðveislu menningararfs og auknar rannsóknir og þekkingaröflun á sviði menningarmála. Þá eru fjölbreytni, aðgengi og sjálfbærni skilgreind sem leiðarljós stefnunnar.
Kynning menningarstefnunnar er hluti af fjölbreyttri dagskrá ráðstefnunnar Skapandi Austurland þar sem fulltrúar menningarlífs, stjórnvalda, rannsókna og skapandi greina ræða stöðu, tækifæri og framtíð lista og menningar í landsbyggðunum.
Þátttaka í ráðstefnunni er ókeypis en skráning er nauðsynleg.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
