Öflugt sumar á vettvangi markaðsmála
Í sumar hefur Austurbrú lagt sérstaka áherslu á að efla myndabanka sinn með nýju og vönduðu myndefni. Ljósmyndari okkar, Esther Ösp Gunnarsdóttir, hefur ferðast vítt og breitt um fjórðunginn og myndað stórbrotna náttúru, kennileiti, áhugaverða áfangastaði, bæjarlíf, veitinga- og gististaði, afþreyingu og margt fleira. Verkefnið er vel á veg komið en ljósmyndarinn verður á ferðinni um Austurland eitthvað fram í ágúst. Regluleg endurnýjun myndabankans er mikilvæg til að tryggja fjölbreytt og vandað myndefni sem nýtist við kynningu á Austurlandi.
Allir samstarfsaðilar Austurbrúar hafa aðgang að myndabankanum og geta nýtt myndir þaðan sér að kostnaðarlausu í eigin markaðs- og kynningarefni. Þannig fá samstarfsaðilar aðgang að fjölbreyttu, faglegu myndefni sem stuðlar að samræmdri og öflugri ímynd Austurlands.
Samhliða þessari vinnu hafa verkefnastjórar á sviði markaðsmála heimsótt fjölda samstarfsaðila víðs vegar um Austurland. Í heimsóknunum hafa þeir afhent samstarfsaðilum fána með Austurlandsstjörnunni auk þess að dreifa uppfærðu korti af fjórðungnum. Heimsóknirnar hafa jafnframt verið gott tækifæri til samtals, upplýsingamiðlunar og áframhaldandi samstarfs um markaðssetningu og eflingu Austurlands sem áfangastaðar.
Af hverju að gerast samstarfsaðili Austurbrúar?
Þú verður hluti af öflugu samfélagi fyrirtækja og stofnana sem vinna saman að því að gera Austurland enn sterkari áfangastað til að heimsækja, búa og starfa á. Samstarfsaðild veitir aukinn sýnileika á innlendum og erlendum kynningarvettvangi, aðgang að markaðsefni, auk fræðslu, tengslanets og sérfræðiráðgjafar. Hvort sem þú starfar í ferðaþjónustu, matvælaframleiðslu, menningu eða annarri atvinnustarfsemi færðu stuðning, tækifæri til samstarfs og vettvang til að efla fyrirtækið þitt um leið og þú leggur þitt af mörkum til jákvæðrar þróunar Austurlands.
Nánar um samstarfsaðildSvipmyndir úr myndatökum sumarsins
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
