Opnað hefur verið fyrir skráningar á Matarmótið 2026 sem fram fer laugardaginn 14. nóvember í Sláturhúsinu á Egilsstöðum. Matarmótið verður nú haldið í sjötta sinn og eru framleiðendur á Austurlandi hvattir til að skrá þátttöku fyrir sunnudaginn 8. nóvember.

Matarmótið hefur fest sig í sessi sem mikilvægur vettvangur fyrir austfirska matvælaframleiðendur til að kynna vörur sínar, efla tengsl og skapa ný viðskiptatækifæri. Á síðasta ári sóttu yfir 1.000 gestir viðburðinn.

Sérstök áhersla verður lögð á að efla tengsl milli framleiðenda og kaupenda í ár. Matarmótið verður haldið í samstarfi við Tilraunaeldhúsið á Hallormsstað, sem mun sjá um viðburðarstjórn.

Matarmótið er sölusýning þar sem gestum gefst kostur á að kynnast fjölbreyttri austfirskri framleiðslu, smakka vörur og versla beint við framleiðendur. Líkt og undanfarin ár geta einnig tekið þátt framleiðendur annarra vara en matvæla, svo framarlega sem þeir nýta austfirsk hráefni.

Fjöldi sýnenda er takmarkaður og eru áhugasamir því hvattir til að tryggja sér pláss tímanlega. Þátttakendur sem hyggjast selja vörur þurfa að hafa tilskilin starfsleyfi.

Skráningarfrestur rennur út sunnudaginn 8. nóvember.

Skráning á Matarmótið 2026