Matarmótið nálgast!
Laugardaginn 14. nóvember verður Sláturhúsið á Egilsstöðum vettvangur austfirskrar matarmenningar. Fjölbreytt úrval matvæla beint frá framleiðendum. Ókeypis aðgangur og öll velkomin!
Bragð af Austurlandi á Matarmótinu
Matarmót Austurlands verður haldið í sjötta sinn í Sláturhúsinu á Egilsstöðum laugardaginn 14. nóvember. Myrra Mjöll Daðadóttir, forstöðumaður Hallormsstaðaskóla, vinnur nú að undirbúningi viðburðarins og leggur sérstaka áherslu á umgjörð hans. Hún segir Matarmótið mikilvægan vettvang þar sem austfirskir matvælaframleiðendur og almenningur geta hist, kynnst og átt viðskipti.
Myrra er myndlistarkona og handverkskona og hefur starfað á sviði lista, kennslu og handverks um árabil. Hún hefur búið á Hallormsstað frá árinu 2018 og gegnir nú starfi forstöðumanns Hallormsstaðaskóla. Á Matarmótinu hefur hún tekið að sér viðburðarstjórn og sér meðal annars um skipulag sýningarrýmisins, útlit og skreytingar.
„Það sem gerir Matarmótið sérstakt er að það skapar meðvitund um fjölbreytni matvælaframleiðslu á Austurlandi,“ segir Myrra.
Hún bendir á að viðburðurinn sé ekki síður mikilvægur fyrir tengslin sem þar myndast. Framleiðendur, stórir sem smáir, fái tækifæri til að kynna og selja vörur sínar milliliðalaust og ræða við viðskiptavini. Gestir geti á móti kynnt sér framleiðsluna, spurt spurninga og stutt við atvinnustarfsemi í heimabyggð.
„Neytendum gefst einnig tækifæri á að spyrja út í afurðina og versla og styðja við bakið á nágrannanum.“
Skapandi sjálfbærni og staðbundin hráefni
Matarmótið tengist vel starfsemi Hallormsstaðaskóla, þar sem löng hefð er fyrir því að vinna með staðbundin hráefni, matarhefðir og matarnýsköpun.
Í skólanum er nú námsbraut í skapandi sjálfbærni á Menntavísindasviði Háskóla Íslands. Þar er meðal annars lögð áhersla á verklega færni, nýsköpun og að kanna nýja möguleika í nýtingu hráefna.
Hallormsstaðaskóli rekur einnig vottað tilraunaeldhús sem nýtist bæði nemendum og matvælaframleiðendum. Þar geta smáframleiðendur unnið að vöruþróun og prófað nýjar hugmyndir.
Myrra nefnir sem dæmi að Sæunn hjá Austurbý vinni flestar vörur sínar í eldhúsinu.
„Eldhúsið er afar dýrmætur vettvangur fyrir nemendur til þess að gera tilraunir, kanna hráefni og vinna frá grunni,“ segir hún.
Þátttaka í Matarmótinu er jafnframt tækifæri fyrir skólann til að efla tengsl við framleiðendur og vekja athygli á starfseminni á Hallormsstað.
Að styðja við nágrannann
Myrra hvetur fólk til að mæta á Matarmótið, ekki aðeins til að kynna sér fjölbreyttar afurðir heldur líka til að leggja sitt af mörkum við að efla matvælaframleiðslu á Austurlandi.
„Ein frábær leið til þess sem einstaklingar í þessu samfélagi er að styðja við bakið hvert á öðru með því til dæmis að versla við staðbundna matvælaframleiðendur.“
Hún segir fátt jafnast á við að kaupa vöru beint af þeim sem framleiðir hana. Á Matarmótinu gefist einmitt tækifæri til þess, auk þess sem gestir geti átt von á góðum mat og mögulega smakkað ýmsar afurðir.
Matarmót Austurlands fer fram í Sláturhúsinu á Egilsstöðum laugardaginn 14. nóvember. Aðgangur er ókeypis og öll velkomin.
Opið er fyrir skráningar sýnenda og eru framleiðendur á Austurlandi hvattir til að skrá þátttöku fyrir sunnudaginn 8. nóvember.
Skráning sýnenda
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
