Fréttatilkynning frá Sambandi sveitarfélaga á Austurlandi
12. nóvember 2026
Fréttatilkynning frá Sambandi sveitarfélaga á Austurlandi
12. nóvember 2026
12. nóvember 2026
Stjórn Sambands sveitarfélaga á Austurlandi (SSA) lýsir miklum vonbrigðum með niðurstöðu fundar með Eyjólfi Ármannssyni innviðaráðherra og starfsfólki ráðuneytisins í gær, miðvikudaginn 11. nóvember. Stjórnin óskaði eftir því að ráðherra frestaði fyrirhuguðum breytingum á Loftbrúnni svo hægt yrði að vinna í sameiningu að lausn um framtíðarfyrirkomulag hennar. Ráðherra lýsti því yfir að ákvörðunin stæði og að breytingarnar gengju eftir.
Tilefni fundarins var ályktun sem stjórn SSA samþykkti 27. október. Á þeim fundi fól stjórnin framkvæmdastjóra Austurbrúar að koma ályktuninni á framfæri við ráðherra og óska eftir fundi með honum.
Á fundinum gagnrýndi stjórn SSA samráðsleysið við undirbúning breytinganna. Þegar Loftbrúin var mótuð var unnið í þéttu samráði við landshlutasamtök sveitarfélaganna, Byggðastofnun og þingmenn. Stjórn SSA telur óásættanlegt að stjórnvöld boði svo veigamiklar breytingar á úrræðinu án þess að eiga fyrst raunverulegt samráð við sveitarfélögin og landshlutasamtökin sem breytingarnar snerta beint.
Með því að færa niðurgreiðsluna úr 40% af fargjaldi í fasta krónutölu fá þeir sem greiða hæstu fargjöldin hlutfallslega minnstan stuðning. Það bitnar sérstaklega á fólki sem þarf að ferðast með skömmum fyrirvara. Innanlandsflug er ein helsta almenningssamgönguæð Austurlands og breytingin þrengir að aðgengi íbúa að þjónustu.
Afstaða ráðherra veldur sérstökum vonbrigðum í ljósi þess að stjórn SSA telur, miðað við afstöðu sem stjórnarþingmenn hafa lýst, að þingmeirihluta skorti fyrir einhliða breytingum á Loftbrúnni.
Að mati stjórnar SSA eru fyrirhugaðar breytingar á Loftbrú til þess fallnar að draga verulega úr jöfnunaráhrifum þessa mikilvæga byggðajöfnunarúrræðis sem komið var á fót árið 2020. Breytingarnar ganga gegn upphaflegum markmiðum Loftbrúar um að jafna búsetuskilyrði og bæta aðgengi íbúa landsbyggðarinnar að þjónustu. Stjórn SSA ítrekar því áskorun sína til ráðherra um að fresta breytingunum og hefja raunverulegt samráð um framtíð Loftbrúar.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
