Eygló hefur ráðið Hrafnkötlu Eiríksdóttur í stöðu verkefnastjóra og mun hún hefja störf snemma á nýju ári. Staða verkefnastjóra var auglýst laus til umsóknar um miðjan september, þrettán umsóknir bárust áður en umsóknarfresturinn rann út.  

Hrafnkatla er með meistaragráðu í dýravísindum frá Kaupmannahafnarháskóla, viðbótardiplóma í hnattrænni heilsu frá Háskóla Íslands, BA í þjóðfræði frá Háskóla Íslands og BSc í náttúru- og umhverfissfræði frá Landbúnaðarháskólanum á Hvanneyri. Hún er fædd og uppalin á Skjöldólfsstöðum í Jökuldal og þekkir því vel samfélagið á Austurlandi. Hrafnkatla hefur búið víða um land og í Danmörku. Síðastliðið ár hefur hún starfað hjá Six Rivers Iceland á Vopnafirði sem verkefnastjóri og í störfum sínum bar hún ábyrgð á áætlanagerð, skipulagsmálum og umsóknum er snertu skógræktaráform fyrirtækisins.

Hrafnkatla segist spennt að koma að betri nýtingu auðlinda og aukinnar nýsköpunar á Austurlandi og bjóðum við hana hjartanlega velkomna til starfa.

Eva Mjöll Júlíusdóttir hefur látið af störfum sem framkvæmdastjóri Eyglóar og eru henni þökkuð vel unnin störf.