Íbúafundur um Brothættar byggðir á Stöðvarfirði fór fram á dögunum og var hann fjölmennasti til þessa. Á fundinum fór verkefnisstjóri yfir verkefnisáætlunina sem byggir á fjórum meginmarkmiðum og 44 starfsmarkmiðum.

Á fundinum fengum gestir yfirlit yfir stöðu hvers starfsmarkmiðs og uppfærslur um þau verkefni sem eru í gangi. Kynntur var einnig Frumkvæðissjóður Stöðvarfjarðar sem hefur frá árinu 2022 stutt við 63 verkefni með samtals tæplega 36 milljónum króna. Öll verkefnin eiga það sameiginlegt að efla og styðja við Stöðvarfjörð á ólíkan hátt.

Að kvöldverði loknum, sem Brauðdagar Deighús buðu upp á, voru kynnt fjögur verkefni sem hlutu styrk úr Frumkvæðissjóði 2025: Hinsegin hátíð Stöðvarfjarðar, útgáfutónleikar tónlistarmannsins Björns Hafþórs Guðmundssonar, Kaffibrennslan Kvörn og Brauðdagar Deighús.

Í lok fundar var gestum skipt í hópa þar sem þeir ræddu meginmarkmiðin fjögur og komu með hugmyndir og ábendingar til framhalds.