Matarmót Austurlands verður haldið laugardaginn 15. nóvember í Sláturhúsinu á Egilsstöðum undir yfirskriftinni „Landsins gæði – austfirsk hráefni“. Þar sameinast framleiðendur, frumkvöðlar og mataráhugafólk í sannkallaðri veislu fyrir bragðlaukana þar sem landshlutinn sýnir hvað hann hefur upp á að bjóða þegar kemur að hráefnum og matargerðarlist.

Á Matarmóti kynna austfirskir matvælaframleiðendur vörur sínar og bjóða gestum að bragða á fjölbreyttum kræsingum – allt frá sælgæti og sultum til þurrkaðs ærkjöts og annarra afurða sem unnin eru úr austfirsku hráefni. Í ár býðst líka framleiðendum sem nýta austfirsk hráefni í annað en matvæli að kynna sína vöru.

Matarmótið er að venju ætlað sem stefnumót framleiðenda og kaupenda, þar sem hægt er að mynda tengsl og tækifæri til nýrra viðskiptasambanda. Matarmótið er opið almenningi frá kl. 14 til 17 og er öllum velkomið að koma og kynnast þeirri fjölbreyttu framleiðslu sem á sér stað á Austurlandi.

Nýsköpun og sjálfbær framtíð í mat og búskap

Matarmót Austurlands hefst með málþingi frá kl. 10 – 12:30 þar sem áhugaverðir fyrirlesarar fjalla um sjálfbæran landbúnað, hæglætismatargerð og nýsköpun í framleiðslu. Öll eru velkomin á málþingið en skráning er nauðsynleg og sendist á [email protected]

Gestir málþingsins eru meðal annarra:

Harriet Olafsdóttir frá Æðuvík í Færeyjum, sem hefur umbreytt fjölskyldubúi sínu í lifandi ferða- og matarmenningarverkefni.

Dóra Svavarsdóttir, matreiðslumeistari og formaður Slow Food á Íslandi, sem fjallar um hæglætishugmyndafræðina og hvernig hún getur styrkt samfélag og sjálfbærni.

Sæunn Vigdís Sigvaldadóttir, býflugnabóndi á Austurlandi, sem segir frá býrækt og framleiðslu hunangs við íslenskar aðstæður.

Hjónin Eydís Magnúsdóttir og Rúnar Máni Gunnarsson frá Sölvanesi, sem stunda lífrænan sauðfjárbúskap.

Hulda Brynjólfsdóttir og Tyrfingur Sveinsson frá Tyrfingsstöðum, sem fjalla um nýtingu sauðfjárafurða og hvernig auðgandi landbúnaður styður við heilbrigt vistkerfi og fæðuöryggi.

Matarmót fyrir alla

Eftir hádegi taka við sölubásar og smakk þegar rúmlega 30 framleiðendur kynna vörur sínar. Fyrir áhugafólk um mat, landbúnað og austfirsk hráefni er þetta einstakt tækifæri til að hitta framleiðendur, spyrja, smakka og styðja við staðbundna framleiðslu.

Aðgangur er ókeypis og öllum opinn.

Halldóra Dröfn Hafþórsdóttir, verkefnastjóri Matarauðs Austurlands, segir Matarmótið hafa fest sig í sessi sem einn stærsta viðburð sem Austurbrú stendur fyrir:

„Matarmótið er gríðarlega góður vettvangur fyrir framleiðendur til að kynna sig, kynnast öðrum og koma sér á framfæri. Það er ekki síður frábært tækifæri fyrir íbúa að sjá með eigin augum og bragðlaukum þá fjölbreyttu framleiðslu sem á sér stað á Austurlandi. Með því að styðja staðbundna framleiðslu styrkjum við hagkerfi Austurlands, styttum flutningsleiðir og fjölgum störfum á svæðinu.“

Stuðningur við staðbundna þróun

Það er Matarauður Austurlands sem stendur fyrir Matarmótinu en um er að ræða verkefni sem Austurbrú heldur utan um fyrir hönd sveitarfélaganna á Austurlandi. Markmið þess er að tengja saman framleiðendur og frumkvöðla í matvælaframleiðslu, veitingafólk og ferðaþjónustu, og stofnanir og sveitarfélög sem styðja við staðbundna þróun. Verkefnið er hluti af áfangastaðaáætlun Austurlands sem Austurbrú sér um að framfylgja fyrir hönd landshlutans.

Matarmót Austurlands nýtur stuðnings frá umhverfis-, orku- og loftslagsráðuneytinu og Sóknaráætlun Austurlands.

Frekari upplýsingar og skráning framleiðenda má finna á austurland.is/matarmot og hjá Halldóru Dröfn Hafþórsdóttur, verkefnastjóra Matarauðs Austurlands, í [email protected]