SSA fundar á Vopnafirði
Tæknin hefur reynst stjórn SSA vel og á síðustu árum hafa flestir fundir hennar farið fram á Teams. En það er engu að síður metnaðarmál að heimsækja þau sveitarfélög sem eiga aðild að sambandinu og fá þannig skýrari skilaboð um þau mál sem brenna á heimamönnum á hverjum stað.
Í júní átti stjórnin góðan fund með heimamönnum á Vopnafirði og samþykkti m.a. tvær ályktanir um mál sem brenna á Austfirðingum þessi misserin.
Stjórn SSA
Fyrirætlun Vegagerðinnar mótmælt
Í ljósi þess að Vegagerðin hefur tilkynnt að ekki verði áfram boðnar út leiðir á vegum hennar innan sveitarfélaga ákvað stjórn að fjalla um málið á fundinum en nú þegar hefur verið tilkynnt að leiðin milli Egilsstaða og Borgarfjarðar verði ekki boðin út aftur.
Stjórnin samþykkti eftirfarandi bókun af þessu tilefni:
„SSA mótmælir uppsögn Vegagerðarinnar á almenningssamgönguleið milli Egilsstaða og Borgarfjarðar eystri á þeim grundvelli að um sé að ræða akstur innan sama sveitarfélags. Það er illskiljanlegt að sama ráðuneyti hvetji sveitarfélög til að sameinast en taki svo af þeim þjónustu fyrir vikið líkt og raunin er hér. Almenningssamgöngukerfi á Austurlandi er veikt og ætti frekar að leita leiða í samvinnu við sveitarfélögin á svæðinu að styrkja kerfið og um leið gera það notendavænna.“
Bílastæðagjöld eru landsbyggðarskattur
Þá hefur umræða um gjaldtöku fyrir notkun bílastæða við innanlandsflugvelli sem hófst á dögunum verið mikið til umræðu meðal almennings á landsbyggðinni en ákvörðunin er skiljanlega mjög óvinsæl. Þetta eru sérstaklega hvimleið tíðindi fyrir Austfirðinga og aðra íbúa landsbyggðarinnar sem þurfa að sækja mikla þjónustu á suðvesturhornið og af því tilefni samþykkti stjórnin eftirfarandi bókun á Vopnafirði:
„SSA vill ítreka fyrri ályktun sína og leggst alfarið gegn gjaldtöku vegna bílastæða við Egilsstaðaflugvöll. Að mati SSA er gjaldið landsbyggðarskattur sem leggst ofan á há fargjöld íbúa Austurlands sem þurfa að sækja margþætta þjónustu til höfuðborgarinnar. Margir sem nýta sér innanlandsflug búa langt í burtu frá flugvellinum og eiga því ekki annan kost en að greiða þessi bílastæðagjöld. SSA fer því fram á það að ef halda á gjaldtökunni til streitu í óþökk heimamanna þá verði tímaramminn rýmkaður til muna og verði a.m.k. nokkrir sólarhringar.“
Þessum skilaboðum SSA hefur verið komið áleiðis til þeirra sem málið varða. SSA hefur frá árinu 1966 unnið að sameiginlegum hagsmunamálum sveitarfélaga og almennings á Austurlandi sem flest lúta að því að komið verði á auknum jöfnuði til búsetu milli landshluta.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
