Austurland verður áfram sem ævintýri líkast. Blómlegt menningarlíf og góðar aðstæður fyrir fjölbreyttar íþróttir og margskonar útivist gerir landshlutann að spennandi stað til að búa á, starfa og heimsækja.
Viðfangsefni markmiðanna snúa að því að Austurland sé:
Samfélag þar sem gestir eru velkomnir og geta skyggnst inn í og verið þátttakendur í daglegu lífi íbúa.
Samfélag sem einkennist af öflugu lista- og menningarlífi.
Svæði þar sem eru framúrskarandi aðstæður til að njóta margskonar útivistar og fyrirmyndaraðstaða fyrir allskonar íþróttir.
Dæmi um stefnumál
Aðalgötur og miðbæir eflist sem þjónustu- og menningarmiðstöðvar með aðlaðandi, heilsueflandi og lifandi miðbæjarumhverfi. Hönnun almenningsrýma taki mið af mismunandi ferðamátum, aðgengi fyrir alla og öryggi gangandi og hjólandi vegfarenda.
Stuðlað verði að því að uppbygging í afþreyingu og ferðaþjónustu dreifist sem mest um landshlutann til að koma í veg fyrir ofálag á tiltekna staði og stuðla að því að allt svæðið njóti aukinnar þjónustu.
Lögð verði áhersla á að skapa möguleika fyrir íbúa og gesti til að njóta og taka þátt í hvers konar menningarstarfsemi. Sérstaklega verði ungt fólk og íbúar af erlendum uppruna hvattir til þátttöku og að miðla sinnimenningu.
Lögð verði áhersla á að hátíðir og viðburðir fari fram sem víðast um landshlutann og að með þeim verði m.a. hlúð að menningu, sögu og sérstöðu hvers samfélagskjarna.
Unnið verði út frá því að kostnaðarsöm uppbygging sértækrar keppnis- og æfingaaðstöðu geti nýst íbúum alls svæðisins.
Staða
Staða
Fjöldi þeirra sem sækja Austurland heim hefur vaxið mjög en hefur ekki dreifst um svæðið sem skyldi. Það getur valdið álagi á helstu áfangastöðum sem eykur hættu á raski og skemmdum auk þess sem það skapar hættu og núning. Á sama tíma reynist ferðaþjónustuaðilum erfitt að byggja upp þjónustu þar sem hún er of árstíðabundin.
Stefnan í áfangastaðaáætlun Austurlands er að dreifa ferðafólki, m.a. með því að laða það að allt árið um kring en til þess þarf að bæta samgöngur yfir veturinn og styrkja vetrarþjónustu.
Fjöldi menningarviðburða, smárra sem stórra einkennir menningarlíf á Austurlandi, s.s. nokkrar af þekktustu tónlistarhátíðum landsins, öflug barnamenningarhátíð, þekktar og verðlaunaðar listahátíðir, auk fjölda minni viðburða og sýninga.
Á Austurlandi eru þrjár menningarmiðstöðvar sem sinna sviðlistum, myndlist og tónlist. Markvisst hefur verið unnið að því að efla skapandi greinar og eru vaxtartækifæri með listnámsbraut ME, LungA-
skólanum, og Skapandi sjálfbærni í Hallormsstaðaskóla.
Menningarstefna er í vinnslu fyrir Austurland, stærri tvö sveitarfélögin hafa unnið slíka stefnu.
Góð almenn aðstaða er til íþróttaiðkunar en skortur á sérhæfðari aðstöðu sem nýta mætti fyrir allan fjórðunginn. Þátttaka barna og ungmenna er góð.
Fjölbreytt söfn, safnvísar og setur þar sem menningararfur á sviði sögu, náttúru og menningar er varðveittur og honum miðlað á margvíslegan hátt. Einnig almenningsbókasöfn og skjalasöfn þar sem skjöl og ljósmyndir sem varða Austurland eru varðveitt og gerð aðgengileg.
Grasrótarstarfsemi á sviði menningar er víða öflug
og þátttaka almennings í henni góð.
