Tækifæri fyrir frumkvöðla á Austurlandi
Frumkvöðlar og nýsköpunarteymi á Austurlandi geta nú sótt um þátttöku í Startup Landinu 2026. Hraðallinn býður upp á leiðsögn sérfræðinga, vinnustofur og öflugt tengslanet sem hjálpar þátttakendum að þróa hugmyndir sínar áfram og færa verkefni sín á næsta stig. Umsóknarfrestur er til 1. september.
Upplýsingar og skráningOpnað fyrir umsóknir í Startup Landið 2026
Nú er opið fyrir umsóknir í Startup Landið 2026, nýsköpunarhraðal fyrir frumkvöðla og nýsköpunarteymi á landsbyggðinni. Hraðallinn er samstarfsverkefni landshlutasamtaka og atvinnuþróunarfélaga um land allt, þar á meðal Austurbrúar, og er markmið hans að styðja þátttakendur við að þróa hugmyndir sínar, efla viðskiptahæfni og byggja upp öflugt tengslanet. Umsóknarfrestur er til 1. september.
Þátttakendur í Startup Landinu vinna markvisst að þróun verkefna sinna með aðstoð reynslumikilla leiðbeinenda og sérfræðinga. Áhersla er lögð á hagnýta vinnu, þróun viðskiptamódela, skapandi hugsun og tengslamyndun sem getur hjálpað verkefnum að komast á næsta stig.
Verðmæt reynsla frá Mjóafirði
Á meðal þátttakenda í Startup Landinu 2025 voru Mjófirðingarnir Margrét Sigfúsdóttir og Guðjón Halldórsson sem standa að ferðaþjónustunni Sólbrekku í Mjóafirði. Þau nýttu hraðalinn til að þróa áfram hugmyndir sínar um heilsársferðaþjónustu með áherslu á kyrrð, náttúru og einstaka upplifun í fámennu samfélagi.
„Við vildum nýta viðskiptahraðalinn til að spegla okkur í öðrum og fá nýja sýn á verkefnið,“ segir Margrét.
Að hennar sögn reyndust mentorafundirnir sérstaklega gagnlegir og hjálpuðu þeim að skerpa á því hvað gerir verkefnið einstakt og hvar helstu tækifærin liggja. Þátttakan staðfesti jafnframt að þau væru á réttri leið með uppbyggingu ferðaþjónustunnar í Mjóafirði.
Fyrir hverja er Startup Landið?
Startup Landið er ætlað frumkvöðlum, sprotafyrirtækjum og nýsköpunarverkefnum á landsbyggðinni sem eru komin af hugmyndastigi og vilja þróa verkefni sín áfram. Hraðallinn fer að mestu fram á netinu sem auðveldar þátttöku óháð búsetu. Þátttakendur fá aðgang að sérfræðiráðgjöf, vinnustofum og öflugu tengslaneti frumkvöðla og atvinnulífs um allt land.
Austurbrú hvetur frumkvöðla á Austurlandi til að nýta sér þetta tækifæri og sækja um þátttöku.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
