Lóu-nýsköpunarstyrkjum fyrir árið 2026 hefur verið úthlutað til 21 verkefnis víðs vegar um landið sem eiga það sameiginlegt að efla nýsköpun, verðmætasköpun og samfélagslega þróun á landsbyggðinni. Heildarúthlutun sjóðsins nemur 100 milljónum króna.

Tvö verkefni með tengingu við Austurland hlutu styrki að þessu sinni. Startup Landið, sameiginlegur viðskiptahraðall landshlutasamtaka og atvinnuþróunarfélaga um allt land, hlaut sex milljóna króna styrk til áframhaldandi uppbyggingar verkefnisins. Austurbrú er meðal samstarfsaðila verkefnisins ásamt öðrum atvinnuþróunarfélögum og landshlutasamtökum víðs vegar um landið.

Markmið Startup Landsins er að efla nýsköpun og frumkvöðlastarfsemi í landsbyggðinni með því að veita frumkvöðlum aðgang að leiðsögn, tengslaneti og þekkingu sem styður við þróun nýrra hugmynda og fyrirtækja.

Þá hlaut Nýtingarmiðstöð á Vopnafirði þriggja milljóna króna styrk. Verkefnið snýr að uppbyggingu nýsköpunar- og frumkvöðlaaðstöðu þar sem áhersla er lögð á að auka verðmæti hráefna, efla tengsl við frumframleiðslu og skapa ný tækifæri fyrir frumkvöðla og matvælaiðnað í landsbyggðinni.

Styrkirnir renna jafnframt til fjölbreyttra verkefna á sviði matvælanýsköpunar, orkumála, heilbrigðistækni, menntunar, stafrænnar miðlunar og sjálfbærrar nýtingar auðlinda. Meðal styrkþega eru verkefni á borð við Fjarlækningar, Bændabatterí fyrir íslenskan landbúnað, Góða ferð, sem er samferðakerfi fyrir dreifbýli, og fjölmörg verkefni sem tengjast sjálfbærri nýtingu auðlinda og þróun nýrrar tækni.

Verkefnin endurspegla þann kraft og fjölbreytileika sem einkennir nýsköpun á landsbyggðinni og sýna hvernig hugmyndir sem spretta úr nærsamfélaginu geta orðið að lausnum sem styrkja atvinnulíf, bæta þjónustu og skapa ný tækifæri til framtíðar.

• Nánari upplýsingar um styrkþega og styrkupphæðir.