Um 70 manns sóttu ráðstefnuna Skapandi Austurland sem fram fór í Eskifjarðarkirkju fimmtudaginn 11. júní. Þar komu saman fulltrúar menningarlífs, stjórnvalda, rannsókna og skapandi greina til að ræða stöðu, tækifæri og framtíð lista og menningar í landsbyggðunum.

Á dagskrá voru fjölbreytt erindi, umræður og vinnustofur þar sem meðal annars var fjallað um hlutverk menningar í samfélagsþróun, skapandi greinar sem drifkraft nýsköpunar og hvernig styrkja megi starfsumhverfi listafólks utan höfuðborgarsvæðisins.

Einn af hápunktum dagsins var kynning á drögum að nýrri menningarstefnu Austurlands sem Austurbrú vinnur fyrir Samband sveitarfélaga á Austurlandi (SSA). Stefnan er nú á lokastigi vinnslu og er ætlað að marka sameiginlega framtíðarsýn fyrir lista- og menningarlíf í fjórðungnum á komandi árum.

„Það sem stendur upp úr hjá mér eftir þennan dag er hvað áhuginn á menningu og skapandi greinum er mikill. Menningarlíf verður ekki til af sjálfu sér heldur með fólki sem er tilbúið að leggja sitt af mörkum og vinna saman að sameiginlegri framtíðarsýn,“ sagði Signý Ormarsdóttir, verkefnastjóri menningarmála hjá Austurbrú.

Jóna Árný Þórðardóttir, bæjarstjóri Fjarðabyggðar, stýrði ráðstefnunni og sagði ánægjulegt að sjá góða þátttöku og líflegar umræður yfir daginn.

„Þetta var virkilega áhugaverð ráðstefna og mjög góð þátttaka. Það er mikilvægt að skapa vettvang fyrir samtal um menningu, listir og þau tækifæri sem felast í skapandi starfsemi fyrir samfélög á landsbyggðinni,“ sagði Jóna Árný en ráðstefnan var haldin í samstarfi Austurbrúar, Menningarstofu Fjarðabyggðar og menningar-, nýsköpunar- og háskólaráðuneytisins.