Dagana 3.–4. september fór fram vinnustofa á Veðurstofu Íslands í tengslum við evrópska rannsóknarverkefnið MEDiate. Austurbrú hefur á undanförnum árum tekið þátt í verkefninu ásamt Veðurstofu Íslands og Háskóla Íslands. Markmið MEDiate er að þróa ákvarðanakerfi sem styður sveitarfélög og yfirvöld við bætta áhættustjórnun vegna náttúruvár í ljósi loftslagsbreytinga.

Evrópska rannsóknarverkefnið MEDiate hófst árið 2021 og fékk árið 2022 tæplega 5 milljón evra styrk úr Horizon Europe rannsókna- og nýsköpunaráætlun Evrópusambandsins. Verkefnið stendur yfir í þrjú ár og er leitt af rannsóknastofnuninni NORSAR í Noregi. Alls taka 18 samstarfsaðilar frá sjö Evrópulöndum þátt í verkefninu, þar á meðal Veðurstofa Íslands, Háskóli Íslands og Austurbrú. Markmið MEDiate er að þróa ákvarðanakerfi (Decision Support System) sem styður sveitarfélög og yfirvöld við bætta áhættustjórnun vegna náttúruvár. Með því að skoða samspil ólíkra váa, til dæmis áhrif aftakaúrkomu á skriðuhættu eða samverkandi áhrif sjávarflóða og árflóða, er unnið að lausnum sem hjálpa samfélögum að undirbúa sig fyrir afleiðingar loftslagsbreytinga.

Verkefnið beitir þverfaglegri nálgun þar sem sérfræðingar í veðurfræði, jarðeðlisfræði, félagsfræði, verkfræði, upplýsingatækni og fleiri greinum vinna saman að því að tryggja að niðurstöðurnar verði notendamiðaðar og studdar viðeigandi tækni.

Dagana 3. og 4. september hittust svokallaðir tilraunahópar (test beds) verkefnisins frá Íslandi og Bretlandi á vinnustofu á Veðurstofu Íslands. Þar komu saman fulltrúar frá Héraðsráðinu í Essex (Essex County Council), slökkviliði og björgunarþjónustu Essex-héraðs (Essex County Fire and Rescue Service) og Háskólanum Anglia Ruskin (Anglia Ruskin University) ásamt íslensku samstarfsaðilunum og boðsgestum frá Reykjavíkurborg og Skógrækt Reykjavíkur.