Um 500 nemendur á Starfamessu Austurlands
Um 500 nemendur sóttu Starfamessu Austurlands í Íþróttahúsinu í Neskaupstað þar sem þeir fengu tækifæri til að kynnast fjölbreyttum störfum og starfsleiðum á Austurlandi. Yfir hundrað manns frá fyrirtækjum og stofnunum tóku þátt í að kynna störf sín fyrir unga fólkinu.
Starfamessan var haldin að frumkvæði sveitarfélaganna á Austurlandi í samstarfi við Austurbrú, Verkmenntaskóla Austurlands og Menntaskólann á Egilsstöðum.
Til Neskaupstaðar mættu nemendur úr 9. og 10. bekkjum grunnskóla víðs vegar af Austurlandi auk nemenda á fyrsta og öðru ári í framhaldsskólum. Um 30 starfsmenn skólanna fylgdu nemendunum en þeir höfðu verið undirbúnir fyrir heimsóknina. Á næstu vikum verður síðan unnið áfram með upplifun og lærdóm dagsins í skólunum.
Sjá hvað er í boði á Austurlandi
Fjölbreyttur hópur fyrirtækja og stofnana tók þátt í Starfamessunni og yfir hundrað manns kynntu störf sín og starfsvettvang. Áherslan var ekki síst á að nemendur fengju innsýn í hvað fólk gerir í raun og veru í ólíkum störfum, hvaða menntun og færni nýtist og hvaða starfsleiðir standa ungu fólki til boða á Austurlandi.
„Markmiðið er fyrst og fremst að unga fólkið okkar fái að sjá með eigin augum hversu fjölbreytt atvinnulífið á Austurlandi er. Hér eru störf sem þau þekkja vel en líka fjölmörg störf sem þau hafa kannski aldrei leitt hugann að,“ segir Páll Baldursson, verkefnastjóri hjá Austurbrú.
Hann segir þátttöku atvinnulífsins mikilvægan hluta verkefnisins.
„Það skiptir miklu máli að fyrirtæki og stofnanir séu tilbúin að leggja sitt af mörkum og eiga samtal við unga fólkið. Þannig styðja þau við náms- og starfsfræðslu skólanna og kynnast um leið mögulegu framtíðarstarfsfólki.“
Starfamessa Austurlands var fyrst haldin á Egilsstöðum árið 2024 og stefnt er að því að hún verði haldin á tveggja ára fresti.
Myndir: Nives Dragan.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
