Fulltrúar Visit Austurland tóku þátt í Vestnorden 2026, einni mikilvægustu ferðakaupstefnu Norður-Atlantshafssvæðisins, sem haldin var í Nuuk á Grænlandi á dögunum. Nýjar ferðaleiðir um Austurland vöktu þar sérstaka athygli erlendra ferðasala.

Vestnorden er árleg ferðakaupstefna þar sem kaupendur og seljendur í ferðaþjónustu frá fjölmörgum mörkuðum koma saman. Kaupstefnan er mikilvægur vettvangur til að byggja upp ný viðskiptasambönd og styrkja tengsl við samstarfsaðila.

Alexandra Tómasdóttir og Erla Dögg Grétarsdóttir sóttu kaupstefnuna fyrir hönd Visit Austurland, vörumerkis Markaðsstofu Austurlands, og áttu tæplega 40 fundi með fulltrúum ferðaskrifstofa víðs vegar að úr heiminum, meðal annars frá Evrópu, Norður-Ameríku og Asíu. Sumir fundanna voru með ferðaskrifstofum sem hafa selt ferðir til Íslands um áratugaskeið en aðrir með nýjum aðilum sem eru að hefja sölu á ferðum til landsins.

„Áhugi á Austurlandi hefur farið vaxandi undanfarin ár og það er ánægjulegt að sjá að sú þróun heldur áfram. Erlendir ferðasalar virðast í auknum mæli sjá tækifæri í því að bjóða ferðamönnum lengri dvöl í einum landshluta, utan hefðbundins háannatíma og með meiri áherslu á upplifun en hraða yfirferð,“ segir Alexandra.

Nýjar ferðaleiðir vekja athygli

Á kaupstefnunni var meðal annars lögð áhersla á tvær nýjar ferðaleiðir um Austurland, Fjarðaleiðina og Hálendishringinn, eða The Fjord Way og Highland Circle. Leiðirnar höfðu nýlega verið kynntar þegar haldið var á Vestnorden og því var kaupstefnan kjörinn vettvangur til að kynna þær fyrir erlendum ferðaskrifstofum og öðrum aðilum í ferðaþjónustu.

Leiðirnar vöktu mikinn áhuga og fengu góðar viðtökur. Þær ramma Austurland inn sem heildstæðan áfangastað og hvetja ferðamenn til að gefa sér tíma til að ferðast um landshlutann og kynnast ólíkum stöðum, náttúru og menningu. Á leiðunum gefst tækifæri til að upplifa eitthvað nýtt á hverjum degi, gista á ólíkum stöðum og njóta fjölbreytts framboðs af afþreyingu og veitingum.

„Það var sérstaklega gaman að kynna nýju ferðaleiðirnar. Þær sýna vel hvernig hægt er að ferðast um Austurland í góðan tíma og upplifa eitthvað nýtt á hverjum degi. Það er hægt að ferðast á milli ólíkra staða, gista, borða og njóta fjölbreyttrar afþreyingar, en alltaf með náttúruna og sérkenni Austurlands í forgrunni,“ segir Erla.

Ný uppbygging og áhugaverðir áfangastaðir í landshlutanum vöktu einnig athygli. Þar má meðal annars nefna Baug Bjólfs, nýjan útsýnispall á leiðinni til Seyðisfjarðar sem opnaði í sumar.

Sameiginlegir styrkleikar Austurlands og Grænlands

Vestnorden gefur þátttakendum einnig tækifæri til að kynnast ferðaþjónustu gestgjafasvæðisins og fá innsýn í uppbyggingu og áherslur þess. Á meðan á kaupstefnunni stóð fóru Alexandra og Erla meðal annars í bátsferð um firðina í kringum Nuuk.

„Það var ótrúlega fallegt að sjá þessa ósnortnu náttúru og upplifa firðina frá sjó. Þarna fann maður ákveðin tengsl við Austurland; firðina, víðernin og sterku náttúruupplifunina sem einkennir bæði svæðin. Það var áhugavert að sjá hvernig Grænlendingar eru að byggja upp ferðaþjónustu sína og fá um leið nýja sýn á okkar eigin landshluta,“ segir Erla.

Mikilvægur vettvangur fyrir Austurland

Vestnorden er sameiginleg ferðakaupstefna Íslands, Grænlands og Færeyja og hefur það að markmiði að tengja saman ferðaþjónustuaðila á svæðinu og erlenda kaupendur. Kaupstefnan er haldin á Íslandi annað hvert ár og þess á milli til skiptis í Færeyjum og á Grænlandi.

Um 250 fyrirtæki tóku þátt í Vestnorden 2026 og þar gafst kostur á að hitta fjölda erlendra ferðaskrifstofa og annarra aðila í alþjóðlegri ferðaþjónustu.

Þátttaka Visit Austurland er liður í því að styrkja stöðu Austurlands sem eftirsóknarverðs áfangastaðar, efla tengsl við erlenda markaði og kynna fjölbreytt framboð landshlutans. Jafnframt gefst þar mikilvægt tækifæri til að fylgjast með breytingum á eftirspurn og þróun í alþjóðlegri ferðaþjónustu.

„Næstu skref felast í að fylgja eftir þeim tengslum sem mynduðust á Vestnorden og halda áfram að kynna þau fjölmörgu tækifæri sem Austurland hefur upp á að bjóða,“ segir Alexandra að lokum.

Mynd efst: Alexandra Tómasdóttir og Erla Dögg Grétarsdóttir sóttu kaupstefnuna fyrir hönd Visit Austurland.